Урусатдин Силисчивалин Комитетдин кьялан аппаратдиъ Москвайин метройиъ жигьил бал’ин алжагъну, дугъаз йивувалин дюшюшдихъди аьлакьалу силисар давам шула. Дидин гьякьнаан идарайин мялуматарин дакьатари хабар тувра.
Метройиъ гъабхьи дюшюшдин видеозапись СМИ-йин ва социальный сетарин дакьатариъ чап гъапIнийи. Душв’ан рябкъюрайиси, Дагъустандиан вуйи шубур жигьил бали, чпи шурак ктукьурайиган, думу шурхъан хъюгъю жигьил бай бегьемди гъурччвну. Йивбаан, чан амрихъан душну, жигьил жилиин дахъбан кьяляхъра, санур тахсиркри, дугъан кIулиз кьусмар йивури гъахьну.
Силисчйирин улупбариинди, думу ляхни лап гъагъи тахсиркарвалси тяйин апIура. Гьаддиз, къанун уьбхру органарин вакилари Дагъустандиан вуйи баярик РФ-дин УК-йин 105-пи маддайин (йивну йикIуз кьаст апIувалин дережа) тахсирси кипра.
Гьацира, тахсиркрари чпи дисруган, полицияйин гъуллугъчйирихъди гъалмагълар апIури гъахьну. Думу гьяракатариъра РФ-дин УК-йин 318-пи маддайиъ (гьюкмин вакиларин тIалабариз аьксивал улупувал) айи лишнар а.
«Дагъустан Республикайин милли политикайин ва диндин ляхнариз лигру министерствойи тахсиркрарин лайикьсуз гьяракатар тянкьид апIура ва чпин баярихъан маш уьру дубхьнайи абйир-бабарин язухъ апIура. Москвайин мет-ройиъ жигьил бай гъурччву жигьилари чпин абйирин, хизанарин, ихь республикайин жигьиларин машар биябур гъапIну», – гъапну министр Энрик Муслимовди.
Дугъан гафариинди, тахсиркарвалин дюшюш социальный сетариъ гьяракатниинди тарабгъну, Дагъустандин жямяаьтдин арайиъ тахсиркрарихьна даккнишин ипра. «Гьелбетда, Дагъустандин жямяаьт сагъу фикрин жямяаьт ву, гьамцдар ужуз тIулари, дагълуйирин ччвурар асккан апIру ляхнар республикайин аьхюну пай агьалйири затра кьабул апIурадар. Нягьякь ляхин гъапIу кас – тахсиркар ву, хъа тахсиркриз миллет адар. Дидкан гьаммишан кIваинди гъибтну ккунду. Къанун уьбхру органари, къанундиз асас вуди, тахсиркрариз жаза тувур, хъа дурари гъурччву бай ухди-ухди сагъ шул кIури, умуд киврача», – давам гъапIну министри.
Дагъустандин саб пай жигьилари республикайизси, вари уьлкейизра машгьурвал хуру, хъа тмунуб пайну дурари гъабхи машгьурвалиин няна алапIуру. Гьюрматлу жигьилар! Ихь республикайиз, гьаму йисан Урусатдин жюрбежюр регионариан фукьан туристар гъафну. Гьадрари гьамцдар ляхнар апIурайинхъа?! Гъушу йишваъ учву ичв хасиятнан харжи тереф гьапIуз улупурачва?
Улихьна йигъари Дагъус-тан Республикайин военный комиссарихъди вуйи пресс-конференцияйиъ Д. Мустафаевдира Дагъустандиан армияйиз гъуллугъ апIуз гъягъюрайи баярира тахсиркарвалар апIувал давам шулайиваликан гъапнийи. Кьюд-шубуд йис улихьна Дагъустандиан вуйи баяр цIибтIан армияйиз гъахури адруган, гьюкмар вари хъюгъну, абйир-бабарин комитетари ккун дапIну, армияйиз гъягъюз ккуни жигьилар гизаф айивализ дилигну, армияйиз гъахру баярин кьадар хъана за гъапIнийи. Ухьуз гьюрмат апIури гъитрухьа. Гъачай, ихь хасиятар ихь хулариъ гъитрухьа. Дагъустанлуйирин намус, гъир’ят ликрин кIанакк ккивидархьа. Наана гъушишра, гьаму баяр Дагъустандин вакилар ву кIури, ухьу дамагъ кади лицруганси апIурхьа.
