20-пи сентябрилан башламиш дапIну, Хив райондиъ варитIан успагьи сес айи аьхюдарин арайиъ «Голос. Взрослые-2021» конкурс мялум дапIна.

 

Дидин тешкилатчйир райондин администрация ва культурайин, спортдин, жигьиларин политикайин ва туризмдин отдел ву.

Му отделин кIулиъ айи Казбек Къазиевди мялум гъапIганси, аьхюдарин арайиъ вуйи конкурс улихьнаси райондиъ кIули гъубшу «Голос. Дети-2021» конкурсдиз ухшар вуйиб ва жигьиларинна аьхю-дарин арайиъ мяълийир апIбан устадвал кайидар ашкар апIбан бадали гъабхурайиб ву.

«Ич асас метлеб – Хив райондиъ мяълийир апIбан бажаранвал кайи жигьилар ашкар ва дурарин вокалин удукьувалар артмиш апIувал вуйич. Конкурс – райондин агьалйириз рягьятвал гъадабгъуз шлу маракьлу серенжемси, мяълийирин ужударсдар устадариз вокалин искусствойиъ чпиз айи удукьувалар улупуз ва лайикьлу пешкешар гъадагъуз мумкинвалра ву», – къайд гъапIну Къазиевди.

КIваин апIурача: Хив ра-йондин 16 йистIан артухъ яшар айи, хусуси пишекарвалин (музыкайин) образование адру, амма мяълийир апIбан бажаранвал кайи жигьилариз конкурсдиъ иштирак хьуз теклиф апIура. Пишекарвалиинди мяълийир апIурайи устадариз конкурс-диъ иштирак хьуз ихтияр адар. Мяълийир анжагъ бабан чIалниинди дапIну ккунду.

Конкурсдин гъалибчйир 3 этапдин натижайиъ 15-пи декабриъ Хив гъулаъ айи райондин культурайин центриъ йигъну сяаьт шубубдиъ ашкар хьиди.