Гьюрматлу ярар-дустар, му зарафатнан ихтилатар учвуз кьабул шул дупну, фикир вуйиз. Зарафатариъ улупнайи ччвурар ичв дар, ичв багахьлуйириндар вуди гъахьиш, багъишламиш апIинай.
Мицдар зарафатнан макьалйир узу гизаф ктагъури шулза. Дурарин аьхюнубсиб пай, йиз уьмриъ шулайи гьядисйириин, гъирагъдилан, жвувандарин арайиан гъеерхьу гафар-чIалариин биналамиш духьну, ярхи апIури, дюз алаури, тартиб гъапIдар вуйиз.
Ветеран дарди дявдиъ айи аба
Варт`арин гъулаъ Нюспягь кIуру кас гьарган дявдиъ, йикь-аьхирзамандиъ айир вуйи. Янаки, икризди гъуншдин датт гъафишра, дугъаз жилар тIурччвувалси гьисаб вуйи.
Дугъхьан сад йигъан чан худли гьерху: «Я аба, гьаму 1941-1945-пи йисари дявдиъ гъахьну кIури, ветеранариз гьар йисан медалар, пул, машинар, хулар туври, дурар лишанлу апIура. Хъа кIару гвачIнинган гъудужвур, хябяхъди дахъайизкьан дявдиъ айи увуз му ккададабхъуз ужу гьюкуматдихьан саб гьюрматнан кагъазкьан тувуз гъабхьундарин?».
Аба гъира жавабнахъ лицури ими.
Аьдилин ишал
5-пи классдиъ урхурайи Аьдилиз чан аьхю баб гизаф ккунир вуйи. Магьан 12-пи апрелиъ аьхю яшар духьнайи баб кечмиш гъахьнийи. Хпарин ишларин сесер гъеерхьу Аьдил чав-чакди, «вари завариз тIирхурайи йигъан жилариз гъягъюрайи баб» кIури, ишуз хъюгънийи.
Аьтирин ниъ
Сад йигъан Навруз, сакъал- ра ккадапIну, кIару костюмарра алахьну, Дербент шагьриз гъягъюру. Дугъхъан ицци аьтирин ниъра гъюрайи. Дербентдиз хъуркьну, чаз ккуни-даккнибдиз лигури, туканаригъян гъяжягъюрайи Навруздин багхьан сар дишагьли гъягъюру. Навруздихъан гъюрайи аьтирин ниъ кубкIган, му дишагьли кIуллан салдагу даршиди имийи. Кьюб-шубуб лик алдагъну, дишагьли кьяляхъ хътакуру ва Навруздихьан гьерхру: «Я жигьил, багъишламиш апIин, уву инжик гъапIну кIури, увук кубзнайиб фу аьтир ву?
Му гаф кубкIу Навруз йицIуд йисан жигьил гъахьи. Дугъан кIулиз хайлин фикрар гъафнийи ва, дурарикан саб ашкар апIури, дугъу гъапнийи: «Му аьтирин ччвур «багахьнаси гъач» ву».
Машиндин кьимат
Рустамхан Мягьячгъалайиъ ариш-вериш лап ужуди иша гъябгъюрайи туканарин аьхюр вуйи. Фициб дерди-бала гъабхьишра, буржназ кепкариз кюмек вуди, вари дугъахьна гъюри шуйи. Нубатнан ражари дугъахьна чан чуччун бай Зиядхан илтIикIнийи. Гьелбетда, думура кепкарин гьякьнаан кюмек ккунди дуфнайир вуйи. Салам-калам тувну, хал-хизандин суракь апIбалан кьяляхъ, дугъу чан дердийикан ктибту.
– Халу, узуз саб ужуб машин дябкъназуз, амма, гьяйифки, дидин кьимат тувуз уз’ан удукьурдар.
– Пагь, жан худул, яд уьлкейиъ айи касаризра кюмек апIруган, узхьан увуз кюмек апIуз даршули айинхъа? Фукьан ву дидин кьимат?
– Дидин кьимат, халу, кьюдварж агъзур ву.
– Гъавриъ гъахьунза, худул. Узхьан фукьан пул ккунди авуз?
– Увхьан варжна урчIвцIур агъзур.
– Гъавриъ гъахьундарза, уву машин увуз гъадабгъурава, даршсана узуз? Сарун уву фу пул киври авахъа дидик? Саб гафниинди, машин гъадабгъ, йип сарун.
