Улихьна йигъари Гергебил райондин ЧIалда гъулан агьалийиз Авар Къойсу нириъ медицинайин саб ражари ишлетмиш апIру шприцар, таблиъ дарман убзру гъурулушар гъидихъну. Дугъу, чаз гъибихъу медицинайин хъархъас видеойиз адабгъну, интернетдиъ ипну. «Дагълу нириз гьаму жюрейин хатIалу шей’ар гатIахьуз фици гъабхьнийкIан!?» – гъибикIну видеойин автори.
Гьаддин кьяляхъ Гергебил райондин администрацияйин гъуллугъчйириз Авар Къойсу нирин гъирагъарихъ хатIалу хъархъас – духтрари ишлетмиш гъапIу шприцар ва жара шей’ар – айи йицIубдиинакьан шишлар гъидихъну. Думу хъархъас ерли ЦРБ-йин аьтрафариина дубхну, силисчивалин органари ахтармиш гъапIну ва лазим вуйи къайдайиинди терг апIбанди гъахьну.
Авар Къойсу нир Гуниб, Гергебил, Тлярата, УнцIукIул, Хунзах, Шамил районарин аьт-рафарилан тина гъябгъюра, ва диди инсанарин дуланажагъ штухъди тямин апIбаъ важиб- лу йишв дибисна. Шид багахь хьайи гъуларин бистнар, багълариз тувру, хизандин мяишатдиъ ишлетмиш апIуру. Нир’ин Ирганайин ва Гоцатлин шид уьбхру йишвар ерлешмиш дапIна, Сулак нир’ин али Чиркейин шид уьбхру йишвазра гьадму нир’ин цирклар гъюра.
Вакьиайихъди аьлакьа- лу вуди кIули гъубху совещаниейиъ РД-йин Прави-тельствойин председатель Аьбдулпатах Амирхановди му ляхин шли гъапIнуш, кIул’ина гъадабгъувал тIалаб гъапIну. Даршиш, республикайин сагъламвал уьбхбан министрикан нирин багахь хьайи вари районарин больницйирин кIулиъ айи духтрар ляхниан адаувал ккун апIуз гаф тувну. «Ухьуз дицисдар пишекрар – саб терефнахъан сагъ апIрудар, тмунуб терефнахъан зегьерлу хъархъас наанди вушра гатIабхьрудар, къайда дюрюбхрудар лазим дархьуз. Тахсир кайидариз варитIан ижми жаза тувну ккунду», – гъапну Аьбдулпатах Амирхановди.
Совещаниейиъ Дагъустандин сагъламвал уьбхбан министр Татьяна Беляевайи къайд гъапIганси, медицинайин хатIалу хъархъас зарарсуз дапIну, ОМС-дин дакьатарин гьисабнаан улупнайи къайдайиинди терг апIури шулу. Гьаддиз больницйириан адабгъу хъархъас ниризди гатIабхьувалин месэла арайиз дуфну ккундайи. Гьаци вушра, Гуниб, Гергебил, Тлярата, УнцIукIул, Хунзах, Шамил районарин больницйирин медицинайин хъархъсар уч хьувал, хъархъас адабгъну гъабхувалин йикьрар ва гъабхру йигъарин къайда ахтармиш гъапIну.
Аьхиримжи йисари хъархъас марцц апIбан мес-эла Дагъустандиъ варитIан учIруди дийибгъна. Хъархъси республикайин табиаьт чIур апIувалихъди сабси, гьятта гьар вазлиъ республикайиъ гагь мушваъ, гагь тушваъ йицIбариинди инсанар зегьерлу духьну больницйириъ ахьра, мал-къара, чIурдин гьяйванатар, гьюлиъ ва даграриъ балугъар йихура.
Тахсиркар фуж ву? Инсан. Ниризди медицинайин хатIалу хъархъсар гатIахьур фуж ву? Закурин йигъкан фикир ктру алчагъ. А. Крыловдин басняйиъ улупнайи мяхъюн гьарикк ккайи силиси, жвуву убхъурайи шид кьалу апIруриз фу пуз шулу? Думу инсан дар, вягьшира дар, думу террорист ву. Дугъаз, гьадму ляхин апIин дупну, я гьюкмари, я больницайин кIулиъ айи духтри буйругъ тувнадар. Эгер ухьу гьарсари чав лихурайи йишваъ хъайи-хъайиси чан вазифйир тамам апIурайиш, гъи му агьвалатнаъ хьидайхьа.
Улихьди гъуларин аьт-рафариин саб урсил шуйи, думура кьюд-шубуд йислан ужуб пейиндиз илтIибкIуйи. Гъи гъулариъ му жюрейин урслар имдар, фицики мал-къара уьбхюз ккунидарра лап кьит гъахьну. Гьамус гъулариъ жара жюрейин хъархъсин эйсивал апIуз удукьури имдар. Гъулариъра инсанариз ужудар шартIар яратмиш дапIна. Варидари чпин хулариз шид, газ, ток дизигна, шагьристанарин яшайиштIан харжиди дар. Инсанари чпиз гъулайвалар яратмиш апIруган, чиркин шид наанди гъябгъюруш, уч гъабхьи хъархъас наанди апIуруш, гьаддикан фикир апIурадар. Вари нирин гъирагъдизди уч шула. Хъа фикир апIуб чарасуз лазим ву. Ухьу му кьадар чиркишин арайиз хури айивалиан жюрбежюр уьзрарихъди аьлакьалу аьгьвалат йислан-йисаз читин шула. Гьаддиз жвуван ва жвуваз ккунидарин, вари инсаниятдин сагъламвал бадали, табиаьтдин, штун марццивал, ихь уьмур уткан апIурайи табиаьт уьбхюрхьа!
