Урусатдин Федерацияйиъ хьадукран призывдин кампания ккебгъна. 2019-пи йисан хьадукран вахтна Дагъустан Республикайиан 3000 ватандаш армияйиъ гъуллугъ апIуз гъягъиди.
Ихь республикайиан армияйиз гъягъру жигьиларин сабпи пай апрелин 17-пи йигъан рякъюъ тIаъну. Дурари Кьиблайин, Кьялан, Ригъ гьудубчIвру ва Ригъ алабхъру дявдин округариъ ва Кафари флотдиъ гъуллугъ апIиди.
Жигьил эскрар рякъюъ тIаъбан серенжем Дагъустан Республикайин сборный пунктдиъ кIули гъубшнийи. Мина армияйиз гъягъюрайидар гьауз дуфнайи абйир-бабар, дустар уч духьнайи. Дурарин улихь удучIвну гъулху РД-йин дявдин комиссариатдин гъуллугъчйири Ватандиз гъуллугъ апIбан гирами буржийикан, армияйиъ вари къайдйир тамам дапIну, гъуллугъ лайикьлуди кIули дубхну, кьяляхъ дуфну ккуниваликан гъапнийи.
«Жигьил эскрариз алабхьру палат, гьаруриз рубкьру ипIруб, лазим вуйи жара шей’ар тувну, рякъюъ тIауз гьязурди айич. Армияйиз гъягъюрайи баярин сагъ’вал мюгькамуб ву. Дурарин арайиъ машин хъапIуз ихтияр айидар, вузар ккудукIну, пишекарвал гъадабгънайидар гизаф а. Дагъустандин баяр аьхю аьшкьниинди Ватандиз гъуллугъ апIуз гьязурди а», – къайд гъапIну призывдин отделин начальникдин заместитель, подполковник Гь.М.Уьмаргьяжиевди. Дугъу гьацира, «Табасарандин нурар» газатдиз вуйи шикил йивбан бадали, Табасаран ва Хив районариан вуйи баяриз дих дапIну, дурарикан жергейиъди дийигъувал тIалаб гъапIнийи. Жигьилар СиртIич, Халагъ, ХустIил, ГьепIил, ТинитI, Лижва, Къужник, Ургъа, ГъванцIил, Хив, Хирижв ва хъана жара гъуларин вакилар вуйи. Узу дурарихьан, чпи фунуб шагьриъ гъуллугъ апIуз гьаъраш, гьерхнийза. Аьхюну пай баяр Новочеркасскдиз, Подмосковьейиз гъуллугъ апIуз гъягъюз гьязурди айи. Ренат Шихмягьямедовди, Сеидагъа Сеидовди, Рамазан Къурбановди, Амир Сефербеговди, Аьли Халибеговди, Максим Пирмягьямедовди, Мурад Гьяжибалаевди ва жарадари чпин абйир-бабариз саламар гъапнийи, сад йислан игитарси армияйиан кьяляхъ гъюз гаф тувнийи. Учура дурарикан ихь республикайин ад чIур дарапIувал, ватандин улихь лайикьлуди чпин буржи тамам апIувал ккун гъапIнийча, ва командованиейин терефнаан ужудар кагъзариз ккилигура-йиваликан гъапнийча.
Учвуз ягъурлу рякъ ибшри, ихь жигьилар!
