Вари Урусатдин инвалидарин жямяаьтлугъдин Дагъустан Республикайин Табасаран райондиъ айи тешкилатдин регьбер Уружбег Демирбеговди (шиклиъ) ич газатдиз мялумат тувганси, 3-пи декабриъ Табасаран райондиъ яшамиш шулайи инвалидарихъди серенжем кIули гъабхбанди ву.

 

 

«1992-пи йисан ООН-ди 3-пи декабрь вари халкьарин инвалидарин йигъси тяйин гъапIну. Мициб йигъ, ихь вари дюн’яйиъ айи инвалидариз сацIибкьан фикир тувбан, дурарин читин месэлйир гьял апIбан бадали, тасдикь дапIнайиб ву.

Инвалидарихьан гужал зегьмет зигбан ляхнар апIуз шуладар, гьаци вушра дурарин фикрар лап зигьимлудар, бажаранвал кайидар вуди шулу. Дурарин арайиъ зирек’вал, бажармиш’вал кайи, зигьимлу, жюрбежюр ляхнар апIуз удукьру касар гизаф а. Чпик кайи гьунарариз лигну, думу касари ихь уьмриъ жюрбежюр цирклариъ – илимдиъ, спортдиъ, бизнесдиъ, художествойин яратмиш апIбариъ, искусствойиъ ва гь. ж. аьхю хъуркьувалар гъазанмиш апIура. Инвалидарин йигъан миди вуйи агьалйири дурарин язухъ апIруси фикир апIувал дюз гъюрадар. Дурариз ккунди айиб, чпиз гьюрмат дапIну, чпик кайи бажаранвализ кьимат тувувал, чпин ихтиярар ва саламатвал уьрхювал ву.

Мициб йигъан, ихь арайиъ яшамиш шулайи гьамцдар инсанарикан дурарира ужуб, архаинвалин яшайиш, лайикьлу уьмур хъапIну ккуниваликан, дураризра зегьмет зигуз ва рягьятвал гъадабгъуз мумкинвал дубхьну ккуниваликан варидиз кIваин апIуб артухъ хьибдар. Ухьу вари инсанар вухьа, эгер ухьу дицдар касариз хил гьачIабккиш, дурариз кюмек гъапIиш, дурарин инвалидвалихъди аьлакьалу читинваларра цIиб хьиди, хъа уьмур ужувлахъинди илтIибкIиди», – къайд гъапIнийи Уружбег Нефтуллаевичди.