Дагъустан Республикайин Гуниб райондин «Согратль» агрофирмайиъ чарвйирин цIийи жинсар арайиз адагъбан, айи жинсар ери жигьатнаан цIийи алаувалин ляхин гъабхури, хайлин йисар ву.

 

Мушваъ лихурайи селекционерарин, Бусуриндин ва Близниченкойин чIуру хьа али марччар немцарин вюртембергский якъарин жинснахъди сатIи дапIну, сабпи ражари марцци хьа, йикк тувру чарвйирин дагълу жинс адабгъбиин зегьмет зигури, 16 йис гъабхьну (1934-пи йислан 1950-пи йисаз). Адабгъу дагълу жинснан чарвйир лизидар, йикку ацIнайидар, дагълу районарин гьавайин шартIарихьна вердиш вуйидар гъахьну. Му жинснан мар-ччариъ айи гъагъишин 45-50 килограмм, хъа али хьайин ярхишин 7-8 сантиметр гъахьну. Якъарикан улхуруш, дурарин гъагъишин 75-85 килограмм, хьайин ярхишин 9-10 сантиметр вуйи.

Гьаму агрофирмайин селекционерари жинсар цIийи алаъбан ляхин гъира давам апIури ими. Гьамусяаьт ду-шваъ, жинсар цIийи алаъбан бадали, «урусатдин йиккун меринос» жинснан якъар ишлетмиш апIура. Зегьметнан сабпи натижйири ляхин улихь гъябгърувалик умуд кивуз гъитра.

Вахтназ вуди Дагъустан Республикайин Правительст-войин председателин заместителин вазифйир тамам апIурайи Аьбдулмуслим Аьбдулмуслимовдин гафариинди, «Согратль» агрофирмайиъ селекция жюрейиинди чарвйирин жинсар цIийи алаъбаан гъабхурайи ахтармиш’валин ляхнин натижйир республикайин жара районариъ айи мяишатариъра ишлетмиш апIуз хъюгъди.