Ноябрин 30-пи йигъан Дагъустандин Глава Сергей Меликов Урусатдин ФСБ-йин сяргьятчивалин органарин гъаравлиъ айи «Расул Гьямзатов» гимийиин сабпи ражари гимйирин пайдагъ за апIувалин серенжемдиъ иштирак гъахьну. Серенжем Мягьячгъалайин гьюлин портнаъ сяргьятчивалин гими гьаргандиз дийибгънайи йишв’ин кIули гъубшнийи.

 

Дагъустандин Главайи сяргьятар уьрхюрайи гъуллугъчйир думу гьядисайихъди тебрик гъапIнийи ва думу серенжем Урусатдин ФСБ-йин Дагъустан Республикайиъ айи сяргьятчивалин Управлениейин баркаллу аьдатар уьрх-бан ва гъуллугънан ад за апIбахьна алдабгъурайи сабсан мяналу гамси тарихдиъ убчIвруваликан гъапнийи.

«Сяргьятчивалин гъаравлиъ айи цIийи гимийиз социалист зегьметнан Игит Расул Гьямзатовдин ччвур тувували сяргьятар уьрхрударин Дагъустандин агьалйирихъди мюгькам аьлакьйир, ихь машгьур шаирин яратмишарихьна ва уьмрин рякъюхьна гьюрмат айивал субут апIура.
Думу ихь жигьиларин кIваъ ватандихьна вуйи ккунивал тербияламиш апIбан, машгьур дагъустанлуйирин уьмрин рякъюхъди таниш апIбан ужуб аьдат ву»,

– къайд гъапIну Сергей Меликовди.

«Гъаравлиъ айи сяргьятчивалин «Расул Гьямзатов» гимийи Урусатдин кьибла сяргьятарин хатIасузвал уьб-хбак лайикьлу пай кивур дупну, умудлу вуза», – аьлава гъапIну Сергей Меликовди.