Табасаран райондин Хюрикк гъулаъ цIийи мектебдин дараматар тикмиш апIбан ляхнар кIули гъягъюри, кьюб вазкьан шула.
Мектебдин дараматар тикмиш апIурайи йишв гьязур апIури, хайлин зегьмет гъизигну. Гьамус тикилишчйири, шибритIар гьязур апIбалан кьяляхъ, душвариъ, армировать дапIну, бетон убзра. Мектебдин дараматдин сяргьятар гьамус ачухъди рякъюз хъюгъну. Тамам дапIнайи ляхнира мектебдиъ урхура-йидарин ва гъулан жямяаьтдин агьалйирин юкIвар шад апIура. Иншаллагь, ляхнихъ хъюгъхъан мина думу бегьемди кIулиз адабгъру йигъар рякъюр.
Шиклиъ: мектебдин дараматдин саб пайнан шибритIарин рябкъювал.
