Гьаму йигъари Хив райондин администрацияйин актовый залиъ райондин образованиейин идарйирин директорарихъди ва ЕГЭ-йинна ОГЭ-йин тешкилатчйирихъди гьюкуматдин аьхиримжи имтигьнар гъахбаан ва тешкил апIбаан вуйи месэлйириз гъилигну. Думу серенжем Хив райондин глава Ярмет Ярметовдин регьберваликкди кIули гъубшнийи.
Хив райондин РОО-йин начальник Казбек Къазиевди къайд гъапIганси, гъябгъюрайи йисан Хив райондиъ ГИА 11-пи классариъ айи 146 выпускникди ва 9-пи классдиъ айи 234 ученикди тувди.
«Гьюкуматдин имтигьнар гъахру вахтна райондиз жара йишвариан 47 тешкилатчи жалб апIиди. Къайд апIуз ккундузузки, сабпи нубатнаъди иллагьки гьадрар аудиторияйиъ имтигьян гъабхбахъан жавабдарар хьиди», – гъапнийи дугъу.
Ярмет Ярметовди къайд гъапIганси, райондиъ ГИА гъабхру вахтна думу мюгькам тешкиллувалиинди ва къанундин тIалабариз асас вуди вари уьлчмйир кьабул дапIну ккунду.
Къайд апIуз ккундучуз, 2019-пи йисан Дагъустандиъ 9-пи классдиъ урхурайи 30 агъзурихьна ученикди ОГЭ ва 11-пи классарин 13 агъзуртIан артухъ выпускнинди ЕГЭ тувди.
