Гьар йисан мартдин вазлиъ вари дюн’яйиъ муштарйирин ихтиярар уьр-хбан Йигъ къайд апIури шулу. Думу аьдат ккудубшу аьсрин 1962-пи йисхъан мина гьяракатнаъ ипнийи. Урусатдин вари регионариъ муштарйирин ихтиярар уьрхбан Йигъ сабпи ражари вуди 1994-пи йисан къайд гъапIну.

 

 

Дупну ккундуки, думу йисари ихь уьлкейин саб республикайиъ айибкьан туканар ва шей’ар масу тувру базрар гьамус саб шагьриъ, райондиъ гьяракатнаъ а.
Мисалназ, Дагъустандин Огни шагьур гъадабгъурхьа. Мялум вуйиганси, шагьрин айтIанмина федеральный мяна айи машинар гъягъру рякъра гъябгъюра. Думу рякъюн гагул ва арчул терефариъ варжариинди хусуси туканар ва кофе убхъру йишвар гьяракатнаъ а. Хъа шагьрин гьацIкьялкан улхуруш, душваъ айи хусуси туканарин, кючйириъ ачмиш дапIнайи базрарин кьадар йигълан-йигъаз артухъ шула, ва душвариъ дуланажагъдиъ лазим шлу саки вари шей’ар а.

Улихьди вари туканар гьюкуматдиндар вуйи, гьаддиз масу туврайи шей’арин, иллагьки ипIру-убхъру сурасатарин ерийин зиин гюзчивал гъабхуйи, алверчйирихьди дурар уьрхбан къайдйир тамам апIуз гъитуйи. Гъи, гьяйифки, ми-мидарди вари туканариъ мяишатдин шей’арихъди, алахьру палтарихъди сабси, алвер апIуз тялукь шартIар адаршра, итIру-убхъру шей’арра саб тукандиан масу туври шулу, дурарин зиин санитарияйин гюзчивалра зяифдитIан гъабхурадар. ДумутIанра савайи, ихь туканариъ, базрариъ ишлетмиш апIуз улупнайи вахт ккудубшу итIру-убхъру шей’ар масу туврайивалин дюшюшарра кми-кмиди алахьуру. Масу тувуз ихтияр тувру документ адарди, жюрбежюр шей’арихъди алвер апIурайи туканарра гизаф а. Дурарин зиин гюзчивал дубхну, дурар къайда-къанундиинди лихурайивал ахтармиш апIрур адар.

Пуз ккундайиб гьадму вуйизки, гьамусяаьт ихь туканариъ, улихьдиси дарди, ккуни жюрейин итIру-убхъру ва жара шей’ар булди масу тувра, амма, гьяйифки, дурарин ери думукьан ужуб дар ва алверчйирин чпин ляхнихьна вуйи жавабдарвалра цIиб дубхьна.

Деврин сабсан нукьсанвал гьаддиъ аки, алверчйири, саб бинара адарди, масу туврайи шей’арин кьиматар кми-кмиди ягьсузди за апIуру. Мисалназ, гьамусяаьт ипIру-убхъру сурсатарин кьитвал адаршра, Украинайиъ кIули гъягъюрайи гьядисйир себебси улупури, республикайин вари туканариъ яшайишдин сабпи нубатнаъ лазим шлу шей’арин кьиматар йигълан-йигъаз за апIура. Гъазанж бадали намус дубгруб вуйинхъа?

 

Шиклиъ: Дербент шагьриъ айи «Пассаж» базарин айитIишв.