30-пи апрелиъ Хив райондин культурайинна эрг’вал йивбан центриъ табасаран хакьдин машгьур шаир, писатель ва драматург Абумуслим Жяфаровдин 110 йисандин юбилей къайд апIбаз бахш вуйи шадлугъар кIули гъушну. Серенжемдиъ РД-йин писателарин Союздин аьхю делегация, Хив райондин гьюкмин кIулиъ айидар ва актив иштирак гъахьну.
Мярака Хив ЦБС-дин улихь хьайи писателин ядигарихъ кюкйир дивбалан ачмиш гъапну.
Дуфнайи хялар ва серенжемдин вари иштиракчйир къаршуламиш апIури, райондин глава Ярмет Ярметовди Абумуслим Жяфаровди табасаран литературайиъ дерин шил гъибтуваликан гъапну.
– Тялукь серенжемар гъахбаз милли меденият уьбхбан, артмиш шулайи наслар рюгьлувалин, ватанпервервалин ва эдеблувалин гьиссариккди тербияламиш апIбан жигьатнаан аьхю мяна а, – гъапну дугъу.
Шаирин уьмрин ва яратмиш апIбан рякъюн гьякьнаан филологияйин илмарин кандидат, республикайин «Табасарандин нурар» газатдин кIулин редактор Гюлягьмад Маллялиевди мяналу доклад гъурхну.
– Абумислим Жяфаровди Темирхан Шалбузовдихъди ва Манаф Шамхаловдихъди сабси табасаран литературайин бина ккивбаъ, думу артмиш апIбаъ аьхю роль уйнамиш гъапIну.
А.Жяфаров 1909-пи йисан Хив гъулаъ бабкан гъахьну.Дербент шагьрин рабфакдиъ илим гъадабгъу жигьил пишекар багъри гъулан мектебдиъ мялимди, Дагъустандин илимдинна педагогикайин изданиейиъ лихуру.
Шаирин сабпи шиърар 1924-пи йисан чапдиан удучIвну, хъа 1931-пи йисан дугъан Дадаш Ражабовдихъди сатIиди вуйи шиърарин гъварч чапдиан удубчIвну.
Абумислим Жяфаров асас вуди литературайиз ккудубшу аьсрин 20-пи йисари гъафну. Шиърарилан савайи, шаирин кьалмиккан 7 поэма, 2 драмайин эсерар ва 2 повесть ккудучIвну. Дурарин арайиъ машгьур гъахьи «Хлинццар кайи зиянкар», «Закуриз рякъ», «ДарчIиди кивур» ва «Накьвдиъ концерт» эсерари лайикьлу йишв дибисна.
Гьяйифки, бязи себебариан лагерариъ гъушу 10 йисандин муддат писателин уьмриан шилсузди гъушундар. Абумуслим Жяфаров 60 йисан яшнаъ ади ихь арайиан гъушну, – гъапну Маллалиевди.
Абумислим Жяфаров кIваина хури серенжемдиъ гьацира РД-йин писателарин Союздин председателин заместитель Марина Аьгьмедова, РД-йин СП-йин табасаран секцияйин кIулиъ айи Сувайнат Кюребегова, шаирар Багъир Раджабов, Шагьвелед Шагьмарданов, Гюльбике Уьмарова ва гь.ж. гъулхну.
Хиварин СОШ-диъ урхурайидари серенжемдиъ шаирин шиърарра гъурхну. Мяракайиъ райондин культурайин гъуллугъчйирин кьувватариинди шаирин пьесйириан гьязур дапIнайи сягьнийирра улупну.
