Республикайиъ артмиш шулайи туризмдихъди аьлакьалу макьалйир газатдин машариъ кми-кмиди чап апIурача. Дидин метлеб – ихь республика туристар гъюру фаслихьна фици гьязур дубхьнаш ктибтувал ву. Туристар гъюлихъна, дагълариз рягьятвал гъадабгъуз гъюру фасил улубкьайиз, дурар кьабул апIру, дурариз ипIруб гьивру йишвар гьязурди ади ккунду. Амма гьелелиг республика лазим вуйи саягъниинди туристар кьабул апIуз гьязур дубхьнайивал рябкъюрадар.
Дербент шагьрин туризм артмиш апIру центрин пишекар Марат Ибрагьимовди «Табасарандин нурар» газатдиз туву мялуматариинди, цци республикайиз планламиш дапIнайи кьадартIан артухъ туристар гъиди.
«Республика ахтармиш апIуз, региондихъди таниш хьуз гъюрайи туристарин кьадар сачтIан цци артухъ шула. Гъюрайи туристари улихь ккимиди дахъру йишвар дидрисиш, хъасин кьан шулу ва дурариз дергру йишвар дихъудар. Гьаддиз, чпи гъюру вахтназ гьязурди гъитбан бадали, инсанари гьеле йисандин эвелиан дахъру йишвар дисура. Гъюрайи туристарин кьадар артухъ шулайивалихъди аьлакьалу вуди, гъийин йигъаз гьял дапIну адру варитIан читин месэлйирикан саб – гьуркIну дахъру йишвар адрувал ву. Жара саягъниинди кIуруш, Дагъустандиъ гостиницйир, отелар ва хялар кьабул апIру хулар лап цIибдитIар адар. Айидаринра агьалйириз дуланжагъдин гъуллугъ апIбан ери думукьан ужуб дар.
Мидланра гъайри, ухьухьна гъюрайи туристариз ипIруб гьивру ужуб дережайин йишварра бегьемди адар. КьатI’иди кIуруш, гьелелиг ухьу заан ерийиинди туристар кьабул апIуз ужудар шартIарихъди тямин дапIнадар», – гъапну Марат Ибрагьимовди.
Ухьуз варидариз рябкъюрайиганси, хьадан фасил ккебгъну, республикайиз туристар гъюз хъюгъиган, гизафси туристар яшамиш хьуз дийигъу дараматарин багахь машинар дерккузкьан йишв гъубзрадар. Мидин гьякьнаанра йиз сюгьбатчийи мялум гъапIганси, машинар дерккуз йишвар адрувалихъди сабси, республикайиз жара йишвариан дуфнайи хялариз жвуван юрднакан ктибтуз шлу ужудар, гьязур дапIнайи гъуллугъчйиринра кьитвал а, гьуркIну туристар гъахру машинар ва думу машинарихъ деъру касарра адар.
«Ав, республикайиз туристар гъюз хъюгъюбси, туриствалин асас маршрутдин рякъяр машинари ацIну шулу. Хъа ихь ватанагьлийири машинар фици хъаъраш, ухьуз варидиз мялум вухьуз. Гьаддиз, туристар гъахбан бадали, сабпи нубатнаъди дурарин хатIасузвалин жавабдарваликан фикир апIури, рулихъ деуб чарасуз лазим ву. Туристар гъахру машинар хъаърайидар, гъягъру йишварихъди таниш вуйи, рякъярин гъавриъ айи касар вуди ккунду.
Йигълан-йигъаз республикайиз гъюрайи туристарин кьадар артухъ шулайивализ лигну, гьамусяаьт туризмдин цирклиъ лихуз шлу, ужуб ерийин пишекрар гьязур апIурайи курсарра ачмиш апIура. Гьацдар касариз кIури, хусуси метлеб айи мялуматарин турарра тешкил апIура. Фицики, му цирклиан аьгъювалар гъадагъуз ккуни касарин кьадар гизаф ву», – аьлава гъапIну Дербент шагьрин туризм артмиш апIру центрин пишекри.
Шиклиъ: Марат Ибагьимов (гагвлахъанди шубурпир) Дербентдиз дуфнайи туристарихъди.
