10-пи июндиъ Табасаран райондин глава Мягьямед Къурбанов чан кабинетдиъ Урусатдин Яракьлу кьувватари Украинайиъ кIули гъабхурайи хусуси метлеб айи дявдин операцияйиъ 15-пи мартдиъ кечмиш гъахьи Хили-Пенжигь гъулан агьали Закир Аьлисултановдин абйир-бабарихъди гюрюшмиш гъахьнийи.
Думу гюрюшдиъ гьацира Табасаран райондин военком Садикь Мурадялиевди, райондин Жямяаьтлугъ палатайин председатель Аьлимирза Гьясановди, Яшлуйирин советдин председатель Къумалат Къумалатовди, Хили-Пенжигьарин советдин глава Шамседин Сяидовди ва гьацдар жарадари иштирак’вал гъапIнийи. Дурари варидари Закирин абйир-бабариз сабур ва башсагълугъвал ккун апIбан гафар гъапнийи.
«Ихь эскрари, Украинайиъ чпин буржи тамам апIури, игитвал улупури, Табасаран халкь ва Дагъустан Республика гьарган ужуб терефна-хъанди улупура. Амма вари ляхнар ухьуз ккуниганси шулдар, дявдиъ ихь варитIан ужударстар баяр йихура. Украинайиъ Табасаран райондиан 20-тIан артухъ игит баяр гъийихну. Дурари чпин буржи жилирвалиинди тамам гъапIну, ихь жигьил игит Закир Аьлисултановра гьадрарин арайиан ву. Дюзди гъапиш, фукьан ужудар гафар гъапIишра, бай кьяляхъ хуз шулдар. Гьамцир игит бай дюрхну, думу арайиз адагъбаз учвуз чухсагъул. Учу ич терефнаан гьар вахтна учхьан шлу кюмек апIуз гьязур вуча», — гъапнийи Мягьямед Къурбановди.
Хъасин Табасаран райондин военком Садикь Мурадялиевди Урусатдин Президентдин 2022-пи йисан 31-пи мартдиъ адабгъу 174-пи нумрайин къарар кайи кагъаз гъурхнийи, дидик гьамци дибикIнайи: «Игитвалиинди чан буржи тамам апIбаз лигну, сержант Аьлисултанов Закир Ферезуллаевичдиз Кьягьялвалин орден тувуб». Дидин кьяляхъ Мягьямед Къурбановди Закирин Кьягьялвалин орден дугъан абйир-бабар вуйи Ферезуллагь ва Къисханум Аьлисултановарихьна гъурубкьнийи.
Закир Аьлисултанов 1999-пи йисан 4-пи сентябриъ Табасаран райондин Хили-Пенжигь гъулаъ бабкан гъахьну. Дугъу 2016-пи йисан Хили-Пенжигьарин кьялан мектеб ккудубкIну. 2019-пи йисхъан мина Закир Ферезуллаевичди контрактдиинди Урусатдин Яракьлу кьувватарин Москвайин областдин Наро-Фаминск кIуру шагьриъ айи 32010-пи нумрайин частнан Кантемировдин танкарин дивизияйин жергйириъ гъуллугъ апIури гъахьну.
Украинайиъ кIули гъябгъюрайи хусуси метлеб айи дявдин операцияйиъ иштирак шулайи Закир, 15-пи мартдиъ Тростянец кIуру шагьриъ гюллйир куркIну хатIа дубхьну, али йишв’ин гъакIну. 26-пи мартдиъ думу багъри гъулаз духну кивну.
Закирин классдин руководитель Оксана Уруджевайи, ихь жигьил игит кIваин апIури, гьамци гъапнийи: «Закири Хили-Пенжигьарин кьялан мектеб заан кьиматариз ккудубкIну. Думу мектебдиъ ва райондиъ кIули гъягъру спортдин ва культурайин серенжемариъра жанлуди иштирак шуйи. Мяълийир апIузра аьшкь айир вуйи. Саб гафниинди, вари терефарихъанди гъудуркьу, зигьимлу бай вуйи. Дугъу учв гьар вахтна бицIидаризра кюмек апIуз гьязур вуйивал улупуйи, яшлуйиринра гьюрмат уьбхюйи».
Закирин абйир-бабар Ферезуллагь ва Къисханум Аьлисултановари, дерд аьгь апIуз даршули, чпин баликан ктибтурайи: «Закир гизаф аькьюллу, хъпехъру, аьхюр-бицIир аьгъю бай вуйи. Дугъан яш 22 йистIан дайи. Швушв хуз гьязур шулайча, хъа дугъу гьелелиг кIул ккиврадайи.
Закири чан гъуллугънан буржи тамам апIури гъахьи частнан батареяйин командир, капитан А. Соколовди, дивизияйин командир, подполковник А. Журавлёвди, 32010-пи нумрайин частнан штабдин начальник, подполковник М. Кулаковди дугъкан гьамци бикIура: «Сержант Аьлисултанов Закир Ферезуллаевичди, 32010-пи нумрайин частнан гаубицйирин чав чаланди гъябгъру артиллерияйин дивизияйин взводдин командирин заместителди лихури, учв лап ужувлан терефнахъанди улупну, думу ужур, аькьюллу эскер вуйи. Дугъу программара, техникара ужуди гъудургънийи. Дугъаз чан ликрихъ хъайи яракьдик кайибра лап ужуди аьгъяйи. Жюрбежюр яракьарианра йивуз ужуди гъудубгънийи ва ихтиятди дурарихьна янашмиш шуйи. Командирин, яшлуйирин, чахъди хъайи дустарин гьюрмат уьбхрур вуйи. Командирари, начальникари гъапиб зат дидригъди улупнайи вахтназ тамам апIуйи».
Закири спортдиъра заан хъуркьувалар улупнийи. Читин, гъагъи ляхнарихьанра гучIрур дайи. Гьарган чан аьгъювалар артухъ апIбахъ шуйи. Чахъди хъайи командирарин ва дустарин арайиъра Дугъаз аьхю гьюрмат айи. Харжи ляхнарикан улхуруш, дугъкан чав хъапIу уьмриъ саб тахсирра ктубчIвундайи».
