Гъябгъюрайи йисан 4-пи июлиъ Урусатдин Президент Владимир Путинди Центральный военный округдин кьушмарин командующий, генерал-полковник Александр Лапин ва Луганскдин Халкьдин Республикайин Халкьдин милицияйин 2-пи армияйин корпусдин командующий, генерал-майор Эседуллагь Абачев Урусатдин Игит кIуру ччвурар тувбиинди лишанлу гъапIну.
Кьюри генераларизра заан ччвурар тувбан гьякьнаан теклиф РФ-дин оборонайин министр Сергей Шойгуйи 4-пи июлиъ Урусатдин Президент Владимир Путиндихъди гъабхьи гюрюшдиъ гъапIнийи. Владимир Путинди разивал улупну ва гьадму йигъан тялукь къарарикк къул гъизигну.
РФ-дин Оборонайин министерствойиан мялум гъапIганси, улихьна йигъан кьюрид генералар кIулиъ ади ихь кьушмари Лисичанск шагьур кьялаъ тIапIну. Гьадму йигъан Луганскдин Халкьдин Республика азад гъапIуваликан мялум гъабхьну. Украинайин неонацист эскрарин хилиъ гъубзнайиб Лисичанск шагьур ва дидин багарихь хьайи бицIи гъулар вуйи. Дурарра азад гъапIну.
Эседуллагь Абачев Хив райондин Зильдикк гъулаъ бабкан гъахьну. Гьеле мектебдиъ урхури имиди дугъаз офицер хьуз ккундийи, гьаддиз мектеб ккудубкIбалан кьяляхъ, думу Харьковдин заан танкарин командованиейин училищейик урхуз кучIвну.
Ихь эллугълийи автомобиларинна бронированный танкарин 78-пи бригадайин материалинна техникайин тяминвалин начальникди, полкнан командирди, хусуси метлеб айи 19-пи мотострелковый дестейин командирди (2014-2019-пи йисар), РФ-дин Яракаьлу Кьувватарин уьмуми кьушмарин 5-пи армияйин штабдин начальникди (2017-2021-пи йисар), Дагъустан Республикайиъ РФ-дин Оборонайин министерствойин вари ихтиярар айи вакилди (2021 – 2022-пи йисар) ляхин апIури гъахьну.
Дугъу эрменйиринна азербайжнарин арайиъ гъахьи гъярхьувалариъ, Чеченарин кьюбпи дявдиъ, 2008-пи йисан Кьибла Осетияйиъ кIули гъушу дявдин гъяракатариъ, Сирияйиъ кIули гъуху дявдин операцйириъ иштирак’вал дапIна.
Эседуллагь Абачевди уьлкейин кIулиъ айидари чан улихь дивнайи мес-элйир гьар вахтна хъуркьувалиинди тамам апIура. 2021-пи йисан 8-пи мартдиъ дугъаз генерал-майор ччвур тувну. Эседуллагь Абачев Кьягьялвалин ордендин, «Дявдиъ заан хъуркьувалар гъадагъбаз лигну» ордендин, «Дирбаш’вал улупбаз лигну» медалин сагьиб ву. Мидланра гъайри, дугъаз Луганскдин Халкьдин Республикайин Игит кIуру ччвурра тувна.
Эседуллагь Абачевдихъди багахьди таниш вуйи Дагъустандин Глава Сергей Меликовди къайд гъапIганси, думу ужуб тажруба айи, фидакар ватанпервер ву. Дугъан регьбервали-ккди, Дагъустандинси, вари Кавказдин хайлин баярира гъуллугъ гъабхура.
«Миржид йисандин геноциддиккан инсанар азад апIувалиъ дугъу уйнаиш гъапIу роль тасдикь дапIну, дугъаз ЛНР-ин Игит ччвур тувувалихъан дамагълувал гьисс апIураза», — гъибикIну РД-йин Главайи чан ТГ-каналиъ.
Сад йис мидиз улихьна генерал Эседуллагь Абачев Урусатдин Игит Рустам Мурадовдихъди сатIиди Хив райондин Зильдикк гъулаъ къаршуламиш гъапIнийи.
Гъябгъюрайи йисан майдин вазлиъ генерал Эседуллагь Абачев Аьгьмад Къадировдин ордендиинди лишанлу дапIна. Чечен Республикайин Глава Рамзан Къадировдин гафариинди, Донбасс нацистарихьан тадабгъбак Эседуллагь Абачевди киву пай ва дугъу уйнамиш гъапIу роль кьадарсуз аьхюб ву. Дугъу дюзди, гьякьлуди ва савадлуди команда тувувализ лигну, ЛНР-ин Халкьдин милицияйин эскрари йицIбариинди гъулар ва стратегияйин лап важиблу объектар нацистарихьан азад апIури, фронт али йишвлан улихьна гъябгъюз гъитну. Дугъаз женг гъабхбаан айи заан тажрубайи ва стратегияйин аьгъювалари улихь дивнайи месэлйир, хусуси состав уьбхюри, гьял апIуз мумкинвал тувра. Эседуллагь Абачевдин кьягьялваликан, дирбаш’валикан ва ватанперверваликан Урусатдин армияйин Игитарин тарихнаъ швнуб-сабансан ебхьидихьуз.
«Табасарандин нурар» газатдин коллективдин терефнаан Эседуллагь Аьбдулмуминович му заан ччвур тувбахъди тебрик апIури, мюгькам дугъаз сагъ’вал, хъуркьувалар, гъалибвал гъадабгъну сагъ-саламатди чан багахьлуйирихьна кьяляхъ гъювал ккун апIурача.
