Гъубшу гьяфтайиъ вари уьлкейиъ акушер-гинекологарин йигъ къайд гъапIну. Думу йигъан узу Дербент шагьриъ «Здоровье» ччвур али медицинайин центриъ акушер-гинекологди лихурайи Бедирханова Камилла Таримирзаевнайихьна илтIикIнийза.
Камилла Бедирхановайин «Здо-ровье» центриъ духтирди лихури урчIвуд йис ву. Му вахтнан арайиъ дугъу чаз гизаф ужур пишекар, савадлу ва саламат духтир ву кIуру гьюрматлу ччвур гъазанмиш дапIна. Дугъриданра, Камилла Бедирхановайи мектеб гъизилин медализ, Дагъустандин медицинайин университетдин акушер-гинекологияйин факультет уьру дипломдиз ккудукIну. Хъа мицир кас харжи духтир хьуб гьичра мумкин дар. Пишекарвалин йигъахъди думу тебрик дапIну, дишагьлийирин жюрбежюр уьзрарихъди аьлакьалу сюгьбат ккебгънийча.
– Камилла Таримирзаевна, акушер-гинекологдин пише ктабгъуз увуз фти вая шли тясир гъапIнийи?
– Му пише ктабгъуз узуз йиз кIван дихну тясир гъапIнийи. Думу аьхю метлеб ади ктабгъуб вуйиз.
Узу медицинайин университетдик кучIвруган, акушер-гинеколог хьуз кьаст гъапIнийза. Гъи гизаф рази вуза йиз ляхниин, гьаз гъапиш жвувкан игьтияж айи касдиз (бицIир адруриз, бедендик уьзур кайириз ва гь. ж.) кюмек шлуган, апIурайи ляхнихьна хъана артухъ аьшкь шулу.
– Яв тажрубайиъ гизафси фицдар уьзрар алахьури шулу ?
– Гизафси миома, эрозия, бицIидар дархьувал ва жарадар. Дишагьлийирин гъи варитIан читин уьзур – аьмгъял (полип) ва сарикан тмунурикна тарагъру уьзрар арайиз хру микробдин уьзур ву. Гъадабгъухьа, дишагьлийин рихлин фуник шлу аьмгъял, дишла дидин улихьишв дибрисиш, думу чIуру уьзриз илтIибкIуз мумкин ву. Хъа сарикан тмунурикна тарагъру уьзрар хру микробдин уьзур йисариинди сагъ апIуб алабхъуру. Йигъан узухьна 10-15 дишагьли илтIикIуру, дурарихъан жавабдарвал гъадабгъну, дурар гьаммишан гюзчиваликк гъитри, телефондиан дурарихъди аьлакьа уьюхюри шулза.
– Увухъди гюрюшмиш хьуз кIури му центрин айитI учIвиган, мушваъ айи къайда, марццишин, гьарсабдихъди тямин дапIнайи аку, мани ужагъар дишлади уларикк ккархьнийиз. Му дарамат гъийин деврин тIалабариз жаваб тувру саягъ албагна. Ккун апIурза « Здоровье» центрикан кьюб гаф пуб.
– Узу ляхин апIурайи медицинайин центр 2009-пи йисан май вазлиланмина либхура. Иццрудариз ич центриъ швнуб-саб жюрейин кюмек тувра: УЗИ-йин кюмекниинди диагноз дивувал; терапияйин, акушер-гинекологдин, невропатологдин ва урологдин кюмек. Му центриъ гьар жюрейин клинический анализарра апIура. Дюзди диагноз дивуб, сагъ апIбан ляхин гюзчиваликк уьбхюб, дидин натижйир фицдар шулуш, вахт ккимиди аьгъю апIуб духтрариз айи заан агъюваларихъди сабси, диагностикайинна лабораторияйин гъулугъну кIули гъабхру жавабдар ляхниканра асиллу ву. Медицинайин техникайи ва лабораторйириъ кIули гъахурайи цIийи къайдйири иццрушнар, дурарин дигиш’валар якьинди аьгъю апIбаз кюмек тувра. ДумутIанна гъайри, юкьуб мертебайин дараматдиъ иццрудар йигъандин вахтна сагъ апIру стационарра либхура ва гьацира йишвнура гъузрударра шулу. Ляхин гизаф ачуз. Пландиинди улупнайибтIан, хайлин артухъ ляхин тамам апIуб алабхъуру.
Бязиган кетIерццнайирихъдитIан кагъзарихъди гизаф вахт харж шулу. Дурар ацIри вари йигъ гъябгъюру.
– Яв ляхин гизаф вахт тIалаб апIруб ву. Хизандин кюмек дарш, думу лап дикъатлуди апIуз читинди шул, кIурза. Яв хизандиканра кьюб гаф йип.
– Дюз вува, хизандин кюмек дайиш, узхьан ляхниъ хъуркьуз хьибдайи. Йиз жилирра – Сабир Юсуфович Бе-дирханов – бицIидарин хирург ву. Ду-гъура гьаму центриъ ляхин апIура. Жилиринра духтирди лихури 10 йис ву. Хизан гизаф албагуб, сар сарин гъавриъ айиб вуйич. Ич бицIидарра гьаци тербияламиш апIурача.
Дугъриданра, Камилла Бедирханова ужуб ляхин кайи акушер-гинеколог, маммолог, онколог духтир ву. Дугъаз ляхниъ аьхю хъуркьувалар ишри.
