Мялум вуйиганси, Табасаран райондиан вуйи гизаф жигьилар Урусатди Украинайин аьтрафариин кIули гъабхурайи хусуси метлеб айи дявдин операцияйиъ иштирак шула. Дурари Донецкдин ва Луганскдин аьтрафариин яшамиш шулайи чвевалин халкьар нацизмдихьан азад апIбаъ аьхю гьунарар улупура. Дявдин женгариъ иштирак шули, командованиейи чан улихь дивнайи месэлйир тамам апIбаъ дирбаш’вал улупурайидарикан сар Табасаран райондин Цухтигъ гъул’ан вуйи Аьлим Насиров ву.

 

 

Аьлим Малларажабович Насиров 1981-пи йисан 23-пи январиъ Табасаран райондин Цухтигъ гъулаъ бабкан гъахьну. Дугъу 2006-пи йисхъан мина контрактдиинди ЗМСБ-йин …-пи нумрайин частнаъ чан гъуллугънан буржи тамам апIура. Аьлим Насировдиз сержант звание а, 2014-пи йисан думу Суворовдин ордендин сагьиб гъахьну.

2022-пи йисан 24-пи февралилан мина майдин 18-пи йигъазкьан думу Украинайиъ гъябгъюрайи хусуси метлеб айи дявдин операцияйиъ иштирак гъахьну.
Аьлимдиз ужуб хизанра а. Дугъу чан уьмрин юлдшихъди 4 риш тербияламиш апIура. Узу Аьлим Насировдихъди гюрюшмиш гъахьунза, ва дявдин гьядисйирин чIиви шагьидрикан дурарикан ктибтуб ккун гъапIунза. Ич арайиъ гъабхьи сюгьбат газатдин машнаъ туврача.

– Аьлим Малларажабович, уву Урусатди Украинайиъ гъабхурайи хусуси метлеб айи дявдин операцияйиъ иштирак гъахьунва. Ихь газат урхурайидариз фицдар дюшюшарикан ктибтуз шулвухьан?

– Узу сифте разведчикди ляхин апIури гъахьунза. Разведкайин метлеб – дявдин цIа йивру яракьар наан аш аьгъю апIувал ву. Ихь кьушмарин жергйириъ гъуллугъ апIурайи эскрари Запорожьейин гъулар-шагьрар нацистарихьан азад апIбан, месэла кIули адабгъури жюрбежюр ляхнар апIури гъахьунча. Аьхиримжи ражари Сладкое кIуру гъул нацистарихьан марцц гъапIунча. Жини, душмандиз хабар адру терефарихъан рякъяр агури, дурарин яракьна техника наан аш аьгъю апIури, командирариз мялуматар туври, хъа нацистарин яракь ва техника терг апIури гъахьунча.
Дявдин операцияйин вахтнаъ Донецкдин областдин агьалйир бомбарин йивбариккан азад апIуйча. Дурари учузра нацистар ерлешмиш духьнайи жини йишварикан, дурариз айи техникайикан хайлин мялуматар тувуйи. Узура, узхьан шлубкьан зегьмет зигури, зийнар гъахьи агьалйириз, учухъди гъуллугъ апIурайи эскрариз – жвуван дустариз кюмек туври гъахьунза. Сладкое гъулаъ саб хизан скутериинди аьжаликкан ккадагъунза. Дурарин мал-къарара кмиди хатIасуз йишваз адаънийза. Думу хизандиз овчарка жинснан хура айи. Дидизра зийнар духьнайи. Хъа узу медицинайин отделениейин командир вуйивализ дилигну, овчаркайин операцияра кмиди гъапIнийза.
Гьадму хизанди узуз скутер багъиш гъапIнийи. Думугандин дявдин женгнаъ зийнар гъахьи йиз юлдшаризра кюмек тувуз мумкинвал гъабхьнийзуз.
Швнуб-саб ражари яркврариъди сарди душну, жиниди минйир ккиври, душмандин техника ва яракьар дагъитмиш гъапIнийза. Узухь 15 гранат, автоматдин 24 магазин хьашра, дурар уьрхюри, са-сабди пакьар апIури, шубуб миномет айи йишвар сарди терг гъапIунза.

– Украинайин агьалйирихъди ихь эскрарин фицдар аьлакьйир айи?

– Мартдин вазли Вербовое кIуру гъулаъ узура йикIуз саб нуфт миди аьжаликкан ккадахьунза. Думу вахтнаъ 12 километр йишв сари уьбхюри гъахьунза. Сифте душмнин артиллерияйин цIа дюз алапIурайир (корректировщик) фуж вуш, аьгъю гъапIнийза. Думу физкультурайин дарсар киврайи мялим вуди гъахьну. Шубуб миномет илиркнийза. Гъул’ан сар ришра аьжаликкан ккадагънийза. Думу гъулан вари жямяаьтди узуз чухсагъул мялум гъапIнийи. Йиз шикил улупну, гьаму фуж ву кIури гьерхиш, вари гъуландариз йиз ччвур аьгъяйи. Узу аьгъю даришри кIури, жара кIалибнан палат алабхьну, велосипеддиинди разведкайиз сарди гъягъюри гъахьунза. Гьелбетда, учу азад апIурайи аьтрафариин яшамиш шулайи агьалйириз учу гизаф ккундийи. Аьдати ватандашарихьна учура гьюрматниинди янашмиш шулийча… Гьамцдар дюшюшар гизаф гъахьну, дявдин женгариъ алахьу гьядисйирикан бикIуруш, саб дафтар цIиб ву.

– Гележегдиз фицдар планар айив?

– Майдин 18-пи йигъан дявдин саб женгнаъ гъагъи зийнар хьпан кьяляхъ госпиталиъ зийнар сагъ апIури гъахьунза. Гьамус отпускдиз гъулаз дуфназа. Отпуск ккудубкIиган Украинайиз кьяляхъ душну ккунду.

– Аьлим Малларажабович, увуз сагъвал тувривуз, дюн’яйин аьгьвалат сагъ-саламат дубхьну, дявдин женгар ккудукIну, игитси жвуван ватандиз кьяляхъ гъуру агьларикан ишриву.