Гьаму йигъари Хив райондин культурайин хулан гьяятдиъ мусурман диндин серенжем – эдеблувалин вечер – кIули гъубшну. Думу райондин имамарин советдин председатель Шябан-гьяжи Салигьовдин жягьтлувалиинди (шиклиъ) тешкил дапIнайиб вуйи.
Мажлис ккебгъруган, дидиъ 300-дихьна кас айи, кьяляхъ-кьяляхъ дидин иштиракчйирин кьадар артухъ шулайи. Райондин аьхю пай гъулариан имамар, нумуна улупури, чпин хизанарра хъади, вечериъ иштирак гъахьнийи. Уч духьнайидарин гевюл уткан нашидар урхбиинди Аьишаханум Гьяжикьурбановайи, Аьбдурягьман Гьяжиевди ва жарадари ачухъ апIурайи.
Мажлис ккебгъруган, дидиъ 300-дихьна кас айи, кьяляхъ-кьяляхъ дидин иштиракчйирин кьадар артухъ шулайи. Райондин аьхю пай гъулариан имамар, нумуна улупури, чпин хизанарра хъади, вечериъ иштирак гъахьнийи. Уч духьнайидарин гевюл уткан нашидар урхбиинди Аьишаханум Гьяжикьурбановайи, Аьбдурягьман Гьяжиевди ва жарадари ачухъ апIурайи.
Чпин улхбари Кьур’андиан вуйи марцци келимйир хури Хив гъулан имам Мансур-гьяжи Везировди, СтIал Сулейман райондин имам Шамиль-гьяжи Уьмаровди, Дагъ.Огни шагьрин медресейин директор Мьюгьюмед-Ариф-гьяжи Ра-мазановди, Къурагь райондин имам Аьгьмад Бабаевди, Ислам диндин университетдин аьлим Аьбдурягьман Аьдиловди абйир-бабарихьна, аьхюр-бицIирихьна вуйи рафтарикан, бедендин шикаствал кайи ва агьли касариз гъайгъу тувбан гьякьнаан, хатир-гьюрматнакан, инсандин гъавриъ ва гъадриъ хьуваликан, чIуруб гъапIуриз жаваб тувуз кьаст дапIну даккниваликан ктибтнийи.
Меълишнарихъди чай убхъури, хушзарафтар апIури, мажлисдин иштиракчйирихъ суалар хъирчри, дюз жавабар тувдариз пешкешар туври, му серенжем ккебгъну ккудубкIайиз, «Аманат» медиахолдингдин кIулиъ айи Аьгьмад Гьясанхановди лап маракьлуди кIули гъубхнийи. Уч духьнайидарин арайиъ лотореяра тешкил гъапIнийи.
Райондиъ аргъаж шулайи наслариз мициб насигьятнан мажлис тешкил апIбаз ва думу баркаллувалиинди кIули гъабхбаз лигну, райондин администрацияйин терефнаан культурайин, спортдин, жигьиларин политикайин ва туризмдин отделин кIулиъ айи Казбек Къазиевди дидин тешкилатчйириз чухсагъул мялум гъапIнийи.
Серенжемдин аьхириъ узу Лика гъулан агьали Тельман Агъабалаевдикан учв иштирак гъахьи му мажлисдин гьякьнаан чан фикрар ачмиш ап1уб ккун гъапIнийза.
«Ав, мицисдар мажлисар гъийин йигъан кьадарсуз лазим ву. Анжагъ райцентриъ ваъ, хъа гьарсаб гъулаъ кьюб-шубуб вазлик – сабанкьан. Саб гъапиб, ухьуз варидиз мялум вухьуз, гъи ихь веледариз дарсар телефонди ва интернетди туврайиваликан. Хъа гьадушваъ, харабайиъ, йигълан-йигъаз лазим вуйибтIан, лазим даруб гизаф шула.
ЦIиб улихьнаси дарди, гъи бицIидаринра диндихьна вуйи лигуб артухъ шула. Баладар гьа, дидкан абйир-бабариз аьгъяди, хайирназ вуйиб ибшри, кIураза. Му мажлисари бязи, юла гъахуз даршлу касариз Аллагь айибдикан кIваин апIура. Тму терефнаан лигуруш, Интернетдиъ, аьлимар вуча кIури, аргъаж шулайи наслариз аькьвлар ва намуснан дарсар туврайи аьмлар апIури, гьякьикьатдиъ дурар кIул’ан адаурайидар гъи цIиб адар. Мицисдар серенжемариъ ихь имамари думу месэлайикан ачухъди, ашкарди ктибтури, гъавриъ тIаъри, гьякьна нягьякь жара апIуз насигьят туври, абйир-бабариз кюмек апIура.
Дидланра савайи, тялукь серенжемдиъ жямяаьтлугъ гъудган дапIну, дидин ужара гьаму ругарилан гъушу жвуван абйир-бабариз, чвйир-чйириз, багахьлуйириз бахш апIуб, адабгъу садакьайикк дурар ккидисну, женнетдин тIяаьм дубхьну чпин рюгьяриз кубкIри пуб, ихь закурин йигъ ислягьуб ва акуб хьувал, дявдин цIин майдандиъ жанар туврайи баяр кIваин апIури, Аллагьдихьан дурар чан рягьматдикк ккауб ккун апIувал гъийин серенжемдин асас метлеб вуйиб субут апIураза», – къайд гъапIнийи Тельман Агъабалаевди.
