Культура ихь халкьдин жямяаьтлугъ уьмрин саб пай ву. Диди инсандин рюгь политикайиси, экономикайиси дарди, артухъ шад апIуру. 13-пи сентябри РД-йин культурайин министр Зарема Бутаевайи «Ачухъ гьюкум» проектдин дахилнаъди «Дагъустан» РИА-йин пресс-конференцйир гъахру залиъ республикайин СМИ-йин журналистариз республикайин культурайин цирклин артмиш’валикан ктибтнийи.

 

 

Пресс-конференцияйиъ жюрбежюр суалар гъитIирккнийи – Расул Гьямзатовдин 100 йисандин юбилей къайд апIбакан, «Пушкинский карта» проектдиинди жигьилар культурайихьна жалб апIбакан, культурайин хуларин ва библиотекйирин материалинна техникайин бина цIийи алапIбакан ва гь.ж..

РД-йин культурайин министриз «Табасарандин нурар» газатдин журналистди гьаму йисан Дербентдиъ Гьюкуматдин табасаран театрин цIийи дарамат тикмиш апIуз хъюгъбанди вуш, суал тувнийи.

«Гьюкуматдин табасаран театр лап йирси дараматдиъ а. Театрин коллектив Лезги государствойин театриъ спектаклар улупуз мажбур шула.

Табасаран театрин цIийи дарамат тикмиш апIбан бадали, проектдинна сметайин документар гьязурди а, экспертизайи дидиз разивалин кьимат тувна. Гьамус ляхин вари пулин дакьатарихъ дийибгъна. Гъавриъ ахьа, проект багьайинуб ву. Дарамат тикмиш апIуз хъюгъбан бадали, бюджетдиан пулин дакьатар жара апIуз мумкинвалар агурача. Месэла правительствойин комиссияйиъ гьял апIбанди ву», – къайд гъапIнийи Зарема Ажуевнайи.