РД-йин образованиейин ва илимдин министерствойин пресс-гъуллугънаан къайд гъапIганси, сентябрин 19-пи йигъан Гьюкуматдин имтигьнарин комиссияйиъ ГИА-22 кампания гъабхбаъ къайда чIур апIбан дюшюшарин ва гележегдиъ дурар текрар хьуз гъидритбан гьякьнаан месэлйириз бахш дапIнайи заседание кIули гъубшну.
Совещаниейин эвелиъ РД-йин образованиейинна илимдин министрин сарпи заместитель Мягьямед Абидовди мялум гъапIганси, гъябгъюрайи йисан ЕГЭ-йин кампанияйиъ имтигьнин иштиракчйирин ва ППЭ-йин гъуллугъчйирин терефнаан къайда чIур апIувалин дюшюшар ашкар духьна.
«Гьар йисан имтигьнарин серенжемариъ иржми къайда кьабул апIуз мажбур хьпан дюшюшар арайиз гъюрайихь. ГИА ачухъди ва заан дережайиъди гъабхбан месэлйириин чарасуз вуди дилихну ккунду», — гъапну дугъу.
Мягьямед Абидовдин кьяляхъ РД-йин минобрнаукийин образованиейин цирклиъ гюзчивал гъабхру управлениейин начальник Шамил Уьмардибировди, 2022-пи йисан республикайиъ ГИА гъабхбан къайдйирин гюзчивалин гьякьнаан, къайда чIур апIувалин дюшюшарин ва профилактикайин натижйирин анализ гъапIну.
Дугъу къайд гъапIганси, гъябгъюрайи йисан ГИА гъабхурайи вахтна имтигьнин къайдйир чIур апIувалин дюшюшариъ дид’ан 63 иштиракчи утIуккну. Мидланра гъайри, комиссияйин йикьрариинди имтигьнарин табшуругъар кайи 59 ляхин жара вахтна тувуз ихтияр тутрувди ва 4 ляхин цIийи кIултIан тувуз ихтияр ади батIул гъапIну.
РД-йин мялуматар тартиб апIру региондин центрин кIулиъ айи Аскандар Мягьямедовди чан нубатнаъ ЕГЭ гъабхурайи вахтна къайда чIур апIбаан тешкиллувалинна технический цирклариъ гъахьи дюшюшар арайиз адагъну ва гьюкмин тамам апIру органарихъди сатIиди вуйи ляхникан, ва гьацира ГИА гъабхбан серенжемариъ Ростелекомдин филиали гъапIу кюмекнакан ктибтну.
