15-пи сентябриъ Хючна гъулаъ спортдин майдандиин ГьепIил гъул’ан вуйи Кьягьялвалин ордендин сагьиб Марат Рягьметовдиз бахш дапIнайи, гьар йисан тешкил апIурайи спортдин серенжем ургубпи ражари кIули гъубшну. Цци му йигъинжагъ Дагъустандин халкьарин сабвалин йигъан дахилнаъди гъубхнийи.
Марат Рягьметовдин ччвурнахъ хъайи спортдин серенжем Табасаран райондиъ варитIан махлукьатлу серенжемарикан саб ву. Душваъ жюрбежюр яшарин 3000-тIан артухъ спортсменари иштирак’вал апIури шулу.
Ццийин серенжем Табасаран райондин администрацияйин жигьиларин центрин вакилари Урусатдин жигьиларин «Спорт – сагъламвалин бина ву» кIуру проектдиз асас вуди тешкил дапIнайи.
М.Рягьметовдин рюгьяриз бахш дапIнайи спортдин серенжем кьюб этапдиъди кIули гъубшнийи: сабпи рякъюъ талитар гъуларин советарин арайиъ гъахьнийи, дурариъ 3000 кас ди иштираквал гъапIнийи. Хъасин финализ удучIвдарин арайиъ спортдин жюрбежюр жюрйириан гъалибчйир тяйин апIбан талитар кIули гъушнийи. Дурар гъахбан метлеб – жигьиларин арайиъ спорт артмиш апIувал, дурарин устадвал ва бажаранлувал ашкар апIувал вуйи.
ВаритIан гизаф тамашичйир футболианна волейболиан кIули гъушу талитари уч гъапIнийи.
Мини-футболиан сабпи йишв Ягъдигъарин командайи гъадабгънийи, кьюбпи йишв – Хючнаарин сабпи нумрайин лицей, хъа шубубпи йишван сагьиб Халгъарин команда гъабхьнийи.
Волейболиан талитар Кьалухъ Мирзайин ччвурнахъ хъайи спорткомплексдиъ кIули гъушнийи.
Сабпи йишв Хянгъярин, кьюбпи йишв – Халгъарин, шубубпи йишв – Къужникарин командйири гъадагънийи.
Гьацира му йигъан спортдин жара жюрйирианра талитар кIули гъушнийи: 100 ва 1500 манзилназ жаргъбаан, али йишвлан ярхлаз ергбаан, 60 кило-йихьна ва 60 килотIан артухъ гъагъ айи спортсменарин арайиъ армспортдиан, гьацира тIурнихьди хъчIюхбар апIбаан.
«Марат Рягьметовдин гьюрмат уьбхбаз бахш дапIнайи талитари район-дин спортдин календариъ чан ла-йикьлу йишв бисура. Дугъу, жара касар чIивиди гъузбан бадали, чан жандилан хил алдабгъну, игитвал улупну. Му касдин уж’вал инсанарин юкIвариъ гьаргандиз гъубзди», – гъапнийи Табасаран райондин главайин заместитель Заур Мусаевди.
Талитариъ гъалиб гъахьидар медалариинди, кубкйириинди ва грамотйириинди лишанлу гъапIну, гьацира дурариз спортдин жюрбежюр авадлугъар ва алатар багъиш гъапIнийи.
Марат Рягьметовди 2013-пи йисан Московский областдин Звенигород кIуру шагьриъ, чан жандилан хил алдабгъну, Москва нирикк ккахьрайи шубар ккадагъну. Маратди гъапIу игитвализ лигну, йикIбалан кьяляхъ дугъаз Кьягьялвалин орден тувну.
