16-пи сентябриъ Табасаран райондин администрацияйин актовый залиъ райондин компартияйин делегатарин конференция кIули гъубшну. Думу конференцияйиз 27 делегатдикан 25 кас дуфнайи. Дина гьацира КПРФ-дин рескомдин 1-пи секретарь Самир Аьбдулхаликьовра дуфнайи.
Конференция ачмиш дапIну, думу кIули гъубхур вахтназ вуди райондин компартияйин вазифйир тамам апIурайи Гьяжиэскер Гьяжиев вуйи. Дугъу райондин компартияйи гъийин йигъазкьан дапIнайи ляхникан ва партияйин жергйириз цIийи касар жалб дапIну ккуниваликан ктибтнийи.
КПРФ-дин Рескомдин 1-пи секретарь Самир Аьбдулхаликьовди чан удучIвну улхбаъ гьамци гъапнийи: «Саб вахтна Дагъустандиъ КПРФ-дин сифтейин 500 тешкилатар, хъа Табасаран райондиъ 150 коммунист айи. Гъи Табасаран райондин компартияйин ляхин нулихъна дуфна. Гьаз мици гъабхьнуш, аьгъю апIуз шуладар, гьаддиз партияйиз цIийи инсанарра кадагъну ккунду, дидин ляхинра цIийикIултIан ккебгъну ккунду».
Партияйин Табасаран райондиъ айи отделениейин вакил Аьбдуризакь Аслановди чан улхбаъ арайиз дуфнайи аьгьвалатнан себебар ачмиш гъапIнийи: «Республикайиъ чан вахтна компартияйин 5000 членар айи. Гьаму ккудушу йисари ухьу халкьдихъди гаф-чIал апIури имдархьа. Совет гьюкуматдин вахтари инсанарихъди гюрюшмиш шуйи. Жара гьюкуматариъ думу ляхин гьамусра гъябгъюри ими»
Гурихъ гъул’ан вуйи Къазихан Къурбановдин гафариинди, мицдар конференцйир кьюд йисак сабантIан шуладар, гьаддиз нубатнан гъюру конференцияйиз мушваъ айи инсанарикан сякьюдартIан гъузуз мумкин дар. Дугъан гафариинди, райондин жигьилар «Саб вуйи Урусат» партияйихъди гъягъбан швумал хьиди.
Гьемшнигъян вуйи Гьябиб Исмяиловди къайд гъапIганси, райондиъ «ЕР» партияйи КПРФ-дин ляхниз манигъвал апIура. «Гьюкмин партияйи илзигури, ихь партияйихьди улихь гъябгъюз гъитидар. 20 йис’ан 40 йисазкьан яш айи жигьилар му партияйиъ айиш, дурарихьан саб фтиккIа миж кивуз шуйи. Миллиардариинди пулар деетура. Гьякимар гъюри-гъягъюра, хъа ухьуна ихь жигьилар фукIа дарди гъузрахьа. Сечкйир – лап лазим дару ляхнар ву. Гъуллугъариъ айидариз, ляхнариан утIуккуру кIури, гучIар ккаъру, гьаддиз саб фицдаркIа хъуркьувалар гъазанмиш апIуз читин ву. ЦIийи йис улубкьайиз, гьаму залиъ айидари гьарури, чахъди хъади дуфну, 5 кас жигьилар партияйик кауб ккун апIурхьа», – теклиф дивнийи дугъу..
Тажудин Мягьрамовдира чан улхбаъ, гъарашугъарин гафариз кюмек тувнийи. «Табасаран райондиъ фунуб-вушра идара сабпи ражари хъябкьру. Ухьхьан сесер тадагъура. Гьамусяаьт Украинайиъ гъягъюрайи гьядисйирихъди инсанарин фикрар гьюдюхюра, гьаддиз ихь ляхин сацIибкьан улихь гъябгъюз мумкинвал дабгну ккунду», – гъапнийи дугъу.
Конференцияйиъ райкомдин членарди 13 кас ктагънийи, хъа дурари Компартияйин 1-пи секретарди Талиб Мутелимов тяйин гъапIнийи. Мидланра гъайри, конференцияйиъ бюройин членарра, мандатарин ва гюзчивалинна ревизияйин комиссйирин вакиларра ктагънийи.
Дурариз гьарсариз табшуругъар тувну, гъюру собраниейиъ чпи гъапIу ляхникан ктибтуб ккун гъапIну. Гьацира улихьдиси комсомолин ва пионерарин тешкилатар ачмиш апIбиин ляхин апIубра табшурмиш гъапIну.
