Гъубшу гьяфтайиъ региондин МВД-йин гъуллугънан сайтдиъ Дербент шагьриъ Генерал Сеидовдин кючейиъ гъабхьи бедбахтвалин дюшюшдикан туву хабар саб дакьикьайин арайиъ вари республикайиз тарабгъну.
РД-йиъ айи МВД-йин пресс-гъуллугънан мялуматариинди, сентяб-рин 11-пи йигъан хябяхъган сяаьт 9-дин гьацIаз багахь шули, Дербент шагьриъ Генерал Сеидовдин ччвурнахъ хъайи кючейиантина «ВАЗ-2107» машин хъапIрайи, яшар 17 йисаъ айи живан бали машинар гъягъру рякълан улдучIвуз ихтияр али йишвлантина чан 5 йисаъ айи ришра хъади гъягъюрайи дишагьлийиин машин алапIну. Ришра, дадара больницайиъ а.
Аьхю бахтнаанси дурар сагъди ими. Хъа, гьяйифки, аьхиримжи вахтна рес-публикайин рякъяриъ гьаму жюрейин хатIалу дюшюшар кми-кмиди хьпан шагьидар шулахьа. Мисалназ, региондин Госавтоинспекцияйиан мялум гъапIганси, гъубшу гьяфтайин 12-диан 18-пи сентябриз Дагъустандин аьтрафариин рякъяринна транспортдин 29 хатIалу дюшюш духьна. Му гьяфтайиъ гъахьи ДТП-йириъ 4 кас гъийихну ва 40 касдиз зийнар гъахьну.
ЦIийи гьяфтайин сабпи йигъан, региондин МВД-йин пресс-гъуллугъну Бабаюрт райондиъ «Астрахань –Мягьячгъала» машинарин рякъюн 420-пи километриъ гизаф къурхулу авария гъабхьиваликан мялумат тувнийи.
«Бабаюрт райондиан вуйи, яш 41 йис дубхьнайи дишагьлийи чан «Daewoo Matiz» машин гъаншарди машинар гъюрайи рякъ’ина адапIну ва «ГАЗ 3302» машиндин улихьинди удучIвну. Му машиндин рулихъ Гъяйтагъ райондин 42 йисаъ айи вакил хъайи», – мялум гъапIну пресс-гъуллугънаан.
Бедбахтвалин дюшюшдин натижайиъ «Daewoo Matiz» машиндин пассажир – 7 йисаъ айи бай – гъахьи зийнариан али йишв’ин кечмиш гъахьну, 7 ва 8 йисариъ айи кьюр риш ва машин хъапIрайир больницайиз гъурхну.
Мидланра гъайри, гьаму йигъан хябяхъган, 10-диз 15 дакьикьа дилибхнайиган, Къарабудагъкент райондиъ «Кавказ» автомобиларин рякъюъ “ВАЗ-21101” машин хъапIрайи, 25 йисаъ айи балин машиндикк рякълан улдучIвуз ихтияр адру йишвлан тина гьялакди гъягъюрайи 38 йисаъ айи жилир ккахъру.
МВД-йин пресс-гъуллугънаан туву мялуматариинди, думу кас гъагъи зийнариан али йишв’ин гъакIну.
Гьюрматлу ватанагьлийир, ихь абйирин «аьжализ мажал адар» кIуру айту а. Хъа гьаци дархьбан бадали, гьарсар касди чанси, чахъди хъайидаринра гъайгъушнаъ духьну, хатIасузвал уьбхюри ккунду.
