21-пи сентябриъ Урусатдин Президент Владимир Путинди уьлкейиъ бегьем дару мобилизацияйин гьякьнаан указдиин къул гъизигну. Указ чап гъапIхъанмина кьувватнаъ убчIвна. Мобилизацияйин серенжемар 21-пи сентябриъ кергъну.
«Бегьем дару мобилизацияйин вахтна дявдин гъуллугъназ дих гъапIу РФ-дин ватандашариз контрактдиинди дявдин гъуллугънаъ айидаризсиб статус ва пулин дакьатар тувди», – къайд гъапIну В.Путинди.
Урусатдин Президентди бегьем дару мобилизацияйин гьякьнаан телевизориан уьлкейин ватандашарихьна вуйи чан илтIикIувалиъ гъапну. Дугъу къайд гъапIганси, гъи Урусатдин Яракьлу кьувватари 1000 километртIан артухъ манзилнаъ, нацистарин гьяракатарихъдиси, Западдин сатIи вуйи дявдин кьувватарихъдира женг гъабхура. Владимир Путиндин гафариинди, дявдин гъуллугъназ Яракьлу кьувватарин жергйириъ гъуллугъ апIури гъахьи, дявдин гьяракатарин пише кайи ва тажруба айи, гьамусяаьт запасдиъ айи ватандашариз сабпи нубатнаъди дих апIиди.
ЦIиб кьандиси удучIвну гъулху Урусатдин оборонайин министр Сергей Шойгуйи къайд гъапIганси, бегьем дару мобилизацияйин дахилнаъди
300000 кас дявдин гъуллугъназ гъягъиди. Думу уьлкейин мобилизацияйин дакьатарикан 1%-кьан ву. Дугъу къайд гъапIганси, дявдин гъуллугъназ дих дапIнайидариз дявдин частариз гьаайиз улихьна аьлава вуди дявдин гьязурлугвалин ляхин улупиди.
Урусатдин Федерацияйиъ бегьем дару мобилизация мялум апIбахъди аьлакьалу вуди, Дагъустандин военный комиссар Дайтбег Мустафаевди республикайиъ бегьем дару мобилизацияйин гьякьнаан приказдиин къул гъизигну. Думу приказдихъди газатдин 6-пи машнаъ таниш хьуз шулу. Дагъустандиъ мобилизацияйин комиссияйин кIулиъ региондин глава Сергей Меликов тяйин дапIна.
