Аьхиримжи вахтари саб ужуб хабар ебхьури имдар. Фукьан гъагъиди вушра, му мялумат тутрувди гъитуз шлуб дар.
26-пи сентябрин гвачIнинган, 34 йисан яшнаъ айи Артем Казанцев, дявдиъ ишлетмиш апIру патронар хъивруси гьязур дапIнайи Макаровдин травматический кьюб тапанчи хьади Ижевск (Удмуртия) шагьрин 88-пи нумрайин мектебдиъ архьну ва чан уларикк ккахьдар вари йивури йихуз хъюгъну. Чав чаз йивну йикIайиз, дугъу 17 кас гъийихну, дурарикан 11 бицIидар, 2 гъаравул ва 5 мялим ву, хъа 23 касдиз зийнар гъапIну.
Ижевскдин мектебдиин алархьу Артем Казанцев учвра улихьна йисари гьаму мектеб ккудубкIур вуйи. Мялум гъабхьиганси, му кас нацистарин гьяракатарин терефкар вуди гъахьну. Гьадму йигъан гвачIнинганра думу нацистарин лишнар ва ишарйир кайи майка алабхьну ва машнан улартIан дярякъру бачукI улубкIну мектебдиз гъафну.
Казанцев Ижевскдин психоневрологияйин диспансерин гьисабнаъ айир вуйи, ва дугъаз яракь уьбхюз ихтиярра адайи.
Сяаьт йицIисабдиъ дугъу мектебдиъ чан улихьна гьудучIву кьюр гъаравул йивну дийихну, классдиан классдиз гъягъюри, чан уларикк ккахьдариз варидариз цIа уьлюбхюри гъахьну. Мектебдиъ урхурайи баяр-шубарин гафариинди, тапанчийиан йивбан пакьар дурариз дарсар гъягъюрайи вахтна гъеерхьну, амма фу гъабхьнуш, дурар сабпну гъавриъ гъахьундар. Ученикарикан сарпирди зиян Ильяйиз гъабхьнийи.
Казанцевди Ильяйин мухрин арччул терефназ гюлле гъивну. Гюлле бицIи жандин кьюбиб терефарианра утIубччвну, аьхю зиян дубхьнашра, бали директорин кабинетдиз гъягъюз чара апIуру ва хатIайикан хабар тувру сигнализ илзигуру. Мектебдиин алархьуваликан хабар гъабхьиган, мялимари вари бицIидар саб сес дарапIди жилариин дахьуз гъитру. Мялимари классдин ракк-нар айтIанди хъяркьюз ва шлубкьан баяр-шубар жин апIуз хъюгънийи.
10-20 дакьикьайилан полицияйин вакиларра хъуркьру. Дурари, мектебдин раккнар дюргъну, вари бицIидар азад апIуру.
Гюлле кубкIнайи шагьид Ильяйи кьанди больницайиъ ктибтганси, тапанчийин пакьар 10-15 дакьикьайиъ сикин дарди апIури гъахьну. Дидин кьяляхъ Артем Казанцевди, саб классдиъ учIвну, чав чаз гюлле йивуру.
Мектебдиз бицIидар йихуз гъафи тахсиркрихь тапанчийихъ хъивру гюллйири хъацIнайи йицIубтIан артухъ магазин хьайи. Гьарсаб магазиндиин саб гаф дибикIнайи – «Даккунвал». Казанцевди думу магазнариъ айи вари патронар ишлетмиш гъапIнийиш, фу мусибат шуйиш, фикриз гъафиган, жандиъ мяхъв абхъру. Амма, гьаци вушра, аьхиримжи йисари урхбан идарйириъ сабишв’инди урхурайидар йивну йихувалин тахсиркарвалариъ ижевскдин мектебдин бедбахтвали пашманвалин рекорд дивну.
