2022-пи йисан 14-пи сентябриъ Дагъустандин Глава Сергей Меликовди Дагъустан Республикайин халкьарин сабвалин йигъаз тялукь вуйи серенжемдиъ, культурайин цирклиъ заан хъуркьувалар гъазанмиш апIбаз лигну, Табасаран райондин ЦБС-дин библиографияйин отделин заведующий Багьарат Ильясовайиз «Дагъустан Республикайин культурайин лайикьлу гъуллугъчи» кIуру ччвур тувну.
Ильясова Багьарат Жа-малудиновна 1967-пи йисан 17-пи апрелиъ Табасаран райондин Хючна гъулаъ бабкан гъахьну. Хючнаарин кьялан мектеб ккудубкIбалан кьяляхъ, думу ДГУ-йин филологияйин факультетдин биб-лиотекйирин отделениейик урхуз кучIвну, гьадму йисан райондин библиотекайиъ ляхин апIузра хъюгъру.
Культурайин цирклиъ 1984-пи йисхъан мина ляхин апIури, библиотекйирин ляхин лазим вуйи къайдайиз хпан бадали, му касди чан аьхю пай кивну.
2014-пи йисхъан 2020-пи йисазкьан Багьарат Жамалудиновна Табасаран райондин искусствйирин мектебдин директорди гъилихну. Гьамусяаьт ЦБС-дин библиографияйин отделин заведующийди ляхин апIура. Чав апIурайи ляхниъ заан хъуркьувалар гъазанмиш апIбаз, гьацира республикайин ва райондин конкурсариъ иштирак хьпаз лигну, дугъаз саб хайлин грамотйир ва пешкешар а.
2011-пи йисан Дагъустан Республикайин улихь заан хъуркьувалар гъазанмиш апIбаз, библиотекйирин цирклиъ гизаф йисари чан вазифйир лайикьлуди тамам апIбаз лигну, думу Дагъустан Республикайин Главайи хилихъ хъибтIру сяаьт тувбиинди лишанлу гъапIну.
2010-пи йисан аьхириъ Мягьячгъала шагьрин Расул Гьямзатовдин ччвурнахъ хъайи республика-йин милли библиотекайиъ «Библиотекарин шаирвалин гаф» конкурсдин натижйир гъивнийи. Думу конкурс, Дагъустан Республикайин милли библиотека тешкил гъапIхъанмина 110 йис тамам хьпахъди аьлакьалу вуди, Дагъустандин писателарин союзди ва республикайин милли библиотекайин кIулиъ айидари 2010-пи йисан эвелариъ тешкил гъапIуб вуйи.
Конкурсдин натижйириинди, Багьарат Ильясова республикайин милли библиотекайин ва РД-йин писателарин союздин терефнаан гьюрматнан грамотайиинди ва кьиматлу пешкешариинди лишанлу гъапIнийи.
2007-пи йисан «Рюгьнан гьяйбатлу гьиссар» республикайин конкурсдиз дугъу чан «Ккуни уьлке» кIуру мяъли тувнийи. Конкурсдин жюрийи думу эсериз заан кьимат тувнийи, ва автор РД-йин культурайин министерствойин терефнаан гьюрматнан грамотайиинди лишанлу гъапIнийи.
«Юлдаш» прогимназияйиъ тешкилатчивалин вазифйир тамам апIури, дугъу урхурайидариз «Йиз дада», «Аяз аба», «Ёлка, ялавлу йибхь» мяълийир ва шиърар яратмиш дапIна.
Табасаран райондин ЦБС-дин директор Рафик Аьлиевди Багьар Ильясовайикан гьамци кIура: «Библиотекайиъ лихури, Багьарат Ильясова гьарган урхурайидарихъди аьлакьайиъ шулу. БицIи урхурайидарихъди дугъу китабдин гьяфтйир, литературайин викторинйир ва жара серенжемар гъахури шулу. Дицдар серенжемари бицIидарин аьгъювалар артмиш апIуз, китабдихьна, аьгъювалар гъадагъбахьна янашмиш хьувал ужувлахъинди илтIибкIуз кюмек тувру».
Багьарат Жамалудиновна-йин гафариинди, аьхиримжи йисари библиотекайиз гъюрайи урхурайидарин кьадар бицIиб ву. «Гьамус библиотек-йириз цIийи китабарра дицикьан гъюри имдар, амма учу ляхин тамам апIбан дережа, активвал цIиб дапIнадарча», – къайд гъапIнийи дугъу ич сюгьбатнаъ.
Ухьура Багьарат Илья-совайиз жандин сагъ’вал, чав апIурайи ляхниъ хъана заан хъуркьувалар ва ярхи уьмур ккун апIурахьа.
