Ухьуз мялум вуйиганси, 27-пи сентябрь бицIидарин багъдиъ лихурайи тербиячийин йигъ ву. Чпин пишекарвалин йигъ къайд апIури, Хив гъулан «Солнышко» ччвур тувнайи бицIидарин багъдиъ лихурайи гъарашугъари му йигъан багъдин юбилейра къаршуламиш гъапIну.

 

 

35 йисандин юбилей тебрик апIури, бицIидарин багъдиз райондин глава Ярмет Ярметов, Хив райондин образованиейин отделин кIулиъ айи Назаряли Тарланов, Хиварин гъулан глава Фахрудин Рамазанов, культурайин, спортдин, жигьиларин политикайин ва туризмдин отделин начальник Казбек Къазиев ва жарадар хялар гъахьнийи.

Дуфнайи хялари чпин удучIвну улхбариъ гъийин ФГОС-дин цIийи тIалабариинди тербиячйири гъабхурайи ляхникан, аргъаж шулайи наслариз сюгьюр кайи гафариинди туврайи тербияйикан гъапнийи. КIуллан хил алдатури, тюмер апIури, хиликк ккайи веледар хил’ин али тIубарси жвувандарик гьисаб дапIну, дурарихь юкIв дипну ва хилар хъиржвну зигурайи зегьметназ чухсагъул мялум гъапIнийи.

«БицIидарин шадвал кайи инчI гъябкъган, гъарашугъарин ачухъ гьав-йир, лихуз иштагь ва аьшкь ади уьлдюбгъюрайи гевюл гъябкъиган, дугъриданра, ччвур «Ригъ» вуйиб мялум шула. Гъит, кIул’ин алтIабгнайи аку зав алди, закурин йигъ умудлуб ва акуб вуди, мициб манишнан ялав ва ригъдин нур саб вахтнара ккядядябхъри!», – гъапнийи шадлугънан мяракайиъ Я.Ярметовди ва тербиячйир райондин администрацияйин терефнаан чухсагъул мялум апIбан кагъзариинди, кюкйириинди ва пешкешариинди лишанлу гъапIнийи.

Тербиячйири ва бицIидари чпин серенжем давам апIури, шиърар гъурхнийи, хъасин Дагъустандин ва Урусатдин халкьарин ихтилатариан дивнайи сягьнйир улупнийи, Дагъустан Республикайин культурайин лайикьлу гъуллугъчи Хайир Шагьовдин ва мяълийирин устад Адият Гьямзаевайин мяълийирихъди ялхъвнар гъапIнийи.
Аьхириъ бицIидарин багъдин заведующий Нарима Ремихановайи пишекарвалин ва юбилейин йигъарихъди аьлакьалуди кIули гъубшу му мани серенжем тешкил апIбаз дидин вари иштиракчйириз чухсагъул мялум гъапIнийи.