Табасаран райондиан республикайин сборный пунктназ Ватан уьбхюз гьязур вуйи жиларин нубатнан десте гъубшну. Мобилизацияйин дахилнаъди призывдик кахънайи жилар рякъюъ тIауз Табасаран райондин глава Мягьямед Къурбанов, жямяаьтлугъ тешкилатарин вакилар, хусуси метлеб айи дявдин операцияйиз гъягъюрайидарин багахьлуйир гъафнийи.

 

 

«Ватандаш’валин буржи тамам апIру, жвуван кьягьялвал улупру вахт дуфна. Украинайиъ кIули гъябгъюрайи дявдин операцияйиъ чпин эскервалин буржи тамам апIури, гизаф жигьилари дирбаш’вал улупура. Ихь ватанагьлийир вуйи генералари чпин ччвурарси, вари республика машгьур гъапIну. Гьязурлугвал гъабхбахьна жавабдарвалиинди лигай, мугъаятвал мудубганай. Первердигар Аллагьди уьрхричву, хъа учу гъалибвал хьади гъюру учвуз ккилигидича», – илтIикIнийи призывникарихьна Мягьямед Къурбанов.

Табасаран райондин жямяаьтлугъ палатайин председатель Аьлимирза Гьясановдира рякъюъ тIаърайидариз хъуркьувалар ккун гъапIнийи. «Гъи ихь уьлкейиз аьхю хатIа а. Ватанди учвуз дих апIура. Учву ичв улихь дивнайи месэлйир лайикьлуди тамам апIури, ихь райондин намус дюбхну ккунду. Ватандин Аьхю дявдин йисарира ихь райондин агьалйири кIул ис гъапIундар. Думуган ихь абйирин, адшарин игитвалиинди, дирбаш’валиинди гъалибвал гъадабгъуз мумкинвал гъабхьну, учву гьадму игитарин наслар вучва», – къайд гъапIну Аь.Гьясановди.

Чпин терефнаан призывникарира багахьлуйирикан сабур апIувал, дердар дарапIувал ккун гъапIну, чиб игитарси кьяляхъ гъюз умуд киврайиваликан гъапну.