Гъийин заманайиъ ихь юкIвар ужуб хабрихъ лицура. Сикин дарди милин-тилин куркIрайи гьевес уьбгъру хабрари ккагънайидар, саб наан-вуш ужувлан ляхин дубхьнайиваликан гъеебхьиган вая жвуваз дициб дюшюш гъябкъиган, ухьуз аьхю багъиш гъапIганси рази шулухьа. Гьаци, абйир-бабар адарди аьхю шулайи баяр-шубариз наан-вушра хал-йишв тувуб варидариз хуш аьгьвалат ву.

 

Магьа улихьнаси Дербентдиъ миржир йитим бицIириз квартирйир тувну. 19-пи сентябриъ шагьрин глава Рустамбег Пирмягьямедов думу бицIидарихъди ва дурарин гъайгъу зигурйидарихъди гюрюшмиш гъахьну. Дербентдин мэри тазади хуларин эйсйир гъахьидариз му ляхин мубарак гъапIну.

«Ич улихь гьаму саягънан кюмекназ ккилигурайидарин игьтияж гьубкIбан месэла ди-йибгъна. Квартирйир агруган, дурар ужуди ккабалгнайидар, яшайишдиз гъулайдар шлуганси, чалишмиш гъахьунча. Ич асас метлеб – думу хулар учвуз кьабул хьувал вуйич», — гъапну уч духьнайидариз Р. Пирмягьямедовди. Дугъан гафариинди, шагьриъ мициб жюрейин ляхин хъанара натижалуди давам хьибди.

Гюрюшдиъ Дербентдин хулар тувбан ва приватизация апIбан отделин начальник Руслан Аскендеровдира мубаракнан гафар гъапнийи. «Хулар масу гъадагъайиз, гележегдиъ дурарин эйсйир шлудар хъади дуфну, гьаруриз кьабул шулуш-шулдарш, гьерхунча. Хулариъ чпин мани апIбан гъурулуш а, дурарин багахь мектеб ва бицIидарин багъ хьа», – гъапну дугъу.

Хуларин эйсйир гъахьи бицIидари ва дурарин гъайгъу зигурайи касари Дербентдин главайиз ва чпин уьмриъ аьхю гьядиса вуйи му ляхниз кюмек гъахьидариз варидиз чухсагъул гъапну.