Сентябрин вазлин 27-диъ «Дагъустан» РИА-йиъ Дагъустан Республикайин ярквран мяишатдин комитетдин председатель Вагьаб Аьбдулгьямидовдин республикайин СМИ-йин журналистарихъди пресс-конфереция кIули гъубшну. Дидин иштиракчйир республикайин яркврариъ цIийир кабхьбан профилактика апIбахъди ва гьацира федеральный «Яркврар уьрхювал» ва милли «Экология» проектар тамам апIбахъди аьлакьалу месэлйириз гъилигнийи.
Пресс-конференцияйин кIулиъ Вагьаб Аьбдулгьямидовди мялум гъапIганси, ццийин йисан дагъустандин яркврариъ цIа кабхъбан 3 дюшюш гьисабназ гъадагъна. ЦIа кабхъу йи-шван уьмуми кьадарну 17,2 га тяйин апIура. 2020-пи йисахъди тевиш, му швнуб-саб ражари цIиб ву. Фицики думуган яркврариъ цIийир кахьбан дюшюшари 196 гайин йишв гъибиснийи.
Вагьаб Аьбдулгьямидовди туву мялуматариинди, идарайин комитетдиъ «Дагъустандин яркврарик цIа кабхъбан центр» кIуру хусуси метлеб айи тешкилат яратмиш дапIна. Дидин ишлетмишвалиъ яркврарик цIа кабхъругандиз тялукь 70 аьдад техника, 1100 аьдад жюрбежюр алатар ва авадлугъар а.
«Гьацира му тешкилатдиз 5 филиалра а. Дурарикан варитIан асасуб ва кIулди йисан либхурайиб Мягьячгъалайин багахь Ленинкентдиъ а, юкьубсана подразделенйир Тлярата, Гуниб, СтIал-Сулейман ва Казбек районариъ ерлешмиш духьна. Дурар мици ерлешмиш апIувал филиалари шлубкьан гизаф кьадар йишв бисруганси апIбахъди аьлакьалу ву», — мялум гъапIну Вагьаб Мягьямедовичди.
Хъасин дугъу чпин идарайи цIийи ркахьбаз аькси серенжемар гъахбакан ктибтнийи. Гьамци, республикайиъ 831 километр ярквран зулариин минерализация апIбан ва гьацира 100 километр рякъяр марцц апIбан ляхнар кIули духна.
«Мидланра гъайри, рякъяр тикмиш апIурача, гьаз гъапиш дагълариъ техникайихьан вари йишвариан гъябгъюз шулдар, гьацира мялуматар кайи тахт-йир диврача, мектебариъ, бицIидарин багъариъ, халкьдин арайиъ гъаврикк ккаъбанна профилактикайин серенжемар кIули гъахурача. 2022-пи йисан ярквран мяишатдин гъуллугъчйири Дагъустандин халкьдин арайиъ 900 лекцйир гъурхну, СМИ-йиъ ва интернетдиъ цIа кабхъбаз аькси темайиан 66 материал чап дапIна», — аьлава гъапIну Дагълесхоздин кIулиъ айири.
Яркврариъ кахьрайи цIийир ктIуршвбан ляхнар тешкил апIбак 2019-пи йислан мина гьяракатнаъ айи «Экология» милли проектди аьхю пай кивра. Гьаци, милли проектдин дахилнаъди цIа ктIубшвру 7 машин ва 40 аьдад жара техника федеральный бюджетдиан жара дапIнайи дакъатарихъ масу гъадагъна.
Пресс-конференцияйин аьхириъ Вагьаб Аьбдулгьямидовди къайд гъапIганси, республикайин яркврариъ цIийир кахьбан аьхюну пай дюшюшар инсан тахсиркар вуди арайиз гъюрайидар ву. Республикайин агьалйири, хъасин чру укI ктубчIвуру кIури, гъеебццу укIак цIа кипра. Гьаддиз дугъу гьамцдар дюшюшарин ва жара тахсиркарваларин шагьидар гъахьидарикан, телефондин 8 800 100 94 00 нумрайиз зенг дапIну, чпиз мялум апIуб ккун гъапIнийи.
