Ихь уьлкейиъ кIули гъябгъюрайи бегьем дару мобилизацияйин тереф заан дережайиъди уьбхюри, Хив райондин агьалйирихьна райондин агъсакъларин советдин председатель, зегьметнан ветеран, Дагъустан Республикайин ла-йикьлу мялим Тажудин Мурадханов илтIикIну.
«Узу ихь уьлкейин Президентди адабгънайи бегьем дару мобилизацияйин терефкар вуза. Гьаз гъапиш, 2014-пи йисхъан мина нацистари ДНР-ин ва ЛНР-ин регионариъ ислягьвалиинди уьмур хъапIуз ккунди айи халкьдиина хурайикьан аьрваларикан, гъира дурарин кIул’ин агъавал апIуз ккунди айиваликан, гьамусяаьт ихь баяри азад апIурайи йишвариъ дуланмиш шулайи инсанар, кьюб хил дазаргну, йигъ-йишв дарпи, дурариз ккилигури гъахьиваликан, гьам телевизориан, гьам интернетдиан улупурайи видеороликарин шагьидар вухьа. Йиз фикриан, бегьем дару мобилизацияйин гьякьнаан къарар хъана улихьна адабгъну ккундийи. Эгер ухьу, Ватандихъан юкIв убгури, гъи вахтниинди ва сабхилди дидин гъуллугънаъ дархьиш, закур кьан хьибди. Дарибшри, дярябкъри, амма чIуруб апIуз кьаст айи хаин душмнин пакьнан сес ихь ругариин вая урчIарихъ хьибди.
Лазим гъабхьиган, ифдин цIадал гьяйиф дарапIди, душмнин гюллдихь мухур гьивну, Ватандин бирмиш-буйругъ гюзет апIури, гъи чпиз повестка аш-адарш суракькьан дарапIди, анжагъ улихь гъягъюз, халкь азад апIуз, дурарин кIул’ин алтIабгнайи аку зав хьуз ният ва кьаст ади, дявдин майдандиъ чпин игитвал улупурайи чвйирикан фикир кади, Ватанди чпин гъюнариин иливнайи буржи тамам апIуз Хив райондиан жвуван хушниинди армияйиз гъягъюрайи жигьилариз икрам апIурача. Мобилизацияйиккан ккадауз чарйир дарагди, дурарин улихьишв гьададабтIди, анжагъ ягъурлу рякъ ккун апIури, варибдин дюзди гъавриъ шулайи ва Ватандиз герек вуйи йигъаз мицдар гъучагъар тербияламиш гъапIу абйир-бабаризра икрам вуйич.
Дявдин майдандиъ яв фуж айив,Тажудин, кIури гьерхиш, кIарзачвуз. Йиз юкIв — халис мялимдин юкIв вуйиз. Зиихъ узу къайд гъапIу дагълу ифи жандиъ убхьурайи баяр ва дявдин майдандиъ намуслуди ихь абйирин рякъ ва ирс давам апIурайи эскрар йиз баярик ва чвйирик гьисаб вузуз, гьаддиз фукьан вушра кIул хъазабгну лицураза. Ккилигураза гьаруриз, гьаруриз жа-жаради, гъалибвал кIваъ ади гъюру йиз халкьдин кьягьялариз!» -–кIура Тажудин Мурадхановди.
