Октябрин 5-пи йигъан Дагъустандин Глава Сергей Меликовди Дагъустан Республикайин призывдин комиссияйин яркьу заседание кIули гъубхну. Дидин гьякьнаан региондин кIулиъ айирин мялуматарин гъуллугъну хабар тувра.
Заседаниейин иштиракчйири Дагъустандиъ бегьем дару мобилизация гъабхбаз бахш дапIнайи – бегьем дару мобилизацияйин дахилнаъди призывдик кахъну, кьушмарин частариъ вердиш апIурайи эскрариз айи шартIарин, бегьем дару мобилизацияйин гьякьнаан гъаврикк ккаъбан ляхин гъабхбан – месэлйир гьял гъапIну.
Сергей Меликовдин гафариинди, Дагъустандиъ бегьем дару мобилизация ккебгъиган, ляхниъ саб жерге камивалар гъахьнийи, гъи республикайиъ думу камивалар дюз апIбан, тек-рар дархьбан зиин ляхин гъабхура.
Региондиъ бегьем дару мобилизацияйихъди аьлакьалу вуди гъахурайи серенжемарин гьякьнаан РД-йин военный комиссар Дайтбег Мустафаевди мялуматар тувнийи.
Военкомдин гафариинди, респуб-ликайин саб бязи муниципалитетари думу ляхин ккудубкIну.
Заседаниейиъ мобилизацияйин дахилнаъди кьушмарин частариъ айи дагъустанлуйирин яшайишдикан региондин вице-премьер Рамзан Жяфаровди ктибтнийи. Дугъу къайд гъапIганси, эскрарин яшайишдин шартIар ахтармиш апIбан бадали, гьюкмин органарин кIулиъ айидарикан, депутатарикан, жямяаьтлугъдин вакиларикан, диндин кIулиъ айидарикан шубуб десте тешкил дапIна. Думу дестйир Чечен Республикайиъ, Буйнакскдиъ ва Каспийин флотилия-йиъ ерлешмиш духьнайи пунктариз гъушну, эскрарихъди, командирарихъди гюрюшмиш гъахьну. ШартIар ужудар ву, эскрар алабхьрубдихъди, ипIрубдихъди тямин дапIна. Гъуллугъ апIуз дуфнайидарин гевюл ачухъди айивал рябкъюра.
Сергей Меликовди шагьрариъ ва районариъ гъийихдариз, инвалидариз повесткйир хътау военный комиссариатарин ляхниз къанундин терефнаан кьимат тувувал ккун гъапIнийи.
Дагъустандин прокурор Алексей Ежовди думу жюрейин гьарсаб дюшюш ахтармиш апIуз гаф тувну. Мидланра савайи, дугъу агьалйирихьан гъафи аьрзйир гьял апIру рабочий десте тешкил апIруваликанра гъапнийи.
Гьацира «горячая линия» тешкил дапIна , гьар йигъан агьалйир кьабул апIура, хъа мобилизацияйин ляхниъ деетурайи гъалатIариз прокурорар дишлади лигура.
Сергей Меликовди СВО гъябгъюрайи йишваъ айи эскрариз кюмек тувбан ляхнихьна бизнесдин вакилар жалб дапIну ккуниваликан гъапнийи. «Бегьем дару мобилизацияйин ляхниз кюмек туврайи жямяаьтлугъ тешкилатариз, бизнесдиз чухсагъул мялум апIуз ккундузуз. Ухьу ихь эскрарин игьтияждин гъавриъ ади, меценатарин кюмек сабпи нубатнаъ лазим вуйи шей’риз харж дапIну ккунду», – къайд гъапIнийи дугъу.
Региондин главайин фикриинди, республикайин промышленностдин карханйирин ляхин эскрариз лазим вуйиб гьясил апIруганси албагну ккунду. Дагъустандиан вуйи эскрар ипIру-убхъру сурсатдихъди тямин апIбазра фикир тувуб лазим ву, хътапIурайи ипIруб мянфяаьт кайиб, ужуб ерийинуб дубхьну ккунду.
Заседаниейин аьхириъ Сергей Меликовди Республикайин призывдин комиссияйин дахилнаъди РД-йин Главайин ва Правительствойин администрацияйин, военкоматдин, бизнесдин, къанунчивалин собраниейин, прокуратурайин ва жара жавабдар органарин вакиларикан ибарат вуйи рабочий десте тешкил апIувал табшурмиш гъапIну. Думу дестейи гьар йигъан арайиз гъюру месэлйир гьял апIиди. Гьадму жюрейин ляхин муниципалитетариъра тешкил апIувал лазим ву.
