РД-йин образованиейин ва илимдин министерствойи къанунсуз митингариъ баяр-шубар иштирак хьувалихъан абйир-бабари ижми жавабдарвал гъабхурайивалин гьякьнаан мялум гъапIну.
Гьамусяаьт чIатан политикайин къайдасуз гьял арайиз дуфнайивалихъди ва Интернетдин сяргьятариъ живанариз къанунсуз гьяракатарихьна, къаршувалин митингариъ иштирак хьувалихьна дих апIурайивалихъди аьлакьалу вуди, министерствойи баяр-шубарин хатIасузвалихъан жавабдарвал дубхну ккунивал кIваин апIура.
РД-йин образованиейин ва илимдин министерствойин сайтдиъ, тялукь гьяракатариъ иштирак’вал гъапIиш, абйир-бабари ва дурарин бицIидари административ ихтиярар чIур апIувалиан жавабдарвал гъабхру маддйирин сиягь тувна.
«Къанунсуз серенжемариъ иштирак хьувалиан живанарин уьмриз ва сагъламвализ аьхю хатIа айиганси, дурарин гьякьна административ ва тахсиркарвал апIбан жавабдарвалин уьлчмйир кьабул апIубра мумкин ву», — кIура мялуматнаъ.
Къайд апIуб лазим вуки, къайдасуз гьяракатариъ иштирак гъахьиш, йисар тамам духьну адру баяр-шубари чписи, абйир-бабарра бедбахтвалихъна хуру.
