Урусатдин мектебарин 6-8-пи классариъ урхурайи баяр-шубари ерийин аьгъювалар гъадагъбан милли ахтармишар гъахура. Гьаддин гьякьнаан РД-йин образованиейин ва илимдин министерствойи мялум гъапIну.
Дагъустандиъ гьаму проектдиъ 780 урхурайидар айи хьуб мектебдиъ иштирак’вал апIура. Дурар Буйнакск шагьрин академический лицей, Хив райондин ГъванцIил гъулан кьялан мектеб, Дагъ. Огнийин 6-пи нумрайин мектеб, Мягьячгъалайин 51-пи нумрайин лицей ва Каспийскдин Амет-Хан Султандин ччвурнахъ хъайи 8-пи нумрайин лицей ву.
Му ахтармишар, компьютерихъ тестирование апIбан жюрейиинди, жавабар интерактивный къайдайиинди дикIури, кIули гъахиди. Ахтармишар гъахбан серенжемарин тешкилатчйирра гъирагъдилан вуйи, асиллу дару касар хьиди. Ахтармишарин натижйир, образованиейин гъурулушдин гъийин гьялназ кьимат тувну, думу артмиш апIбан программйир яратмиш апIбаъ ишлетмиш апIиди.
Аьгъюваларин милли проект, Урусатдиъ аьгъювалар тувбан саб вуйи къайда тешкил дапIну, образованиейин гъурулуш улихьна гъабхуз диш дапIнайиб ву. Думу Рособрнадзорин жягьтлувалиинди 2014-пи йисан ккебгъну, ва проектдиз асас вуди йискьубаъ кьюб ражари урхбан жюрбежюр предметариан ахтармишар гъахура.
