Дагъустандин гьюкуматдин технический университет тешкил гъапIхъанмина дюзди 50 йис тамам гъабхьну.
Му юбилейихъди аьлакьалу вуди 8-пи октябриъ кIули гъушу серенжемариъ Дагъустандин Глава Сергей Меликовра иштирак гъахьну. Шадлугънан серенжем ккебгъайиз улихьна региондин кIулиъ айир, ДГТУ-йин музейин выставкйир гъахру залиъ дивну, улупурайи вуздин хъуркьуваларихъди таниш гъахьнийи. Душваъ ДГТУ-йин вакилари къайд гъапIганси, вуздин бязи илимдин яратмиш апIбариз барабардар жара йишвариъ адар.
ДГТУ-йин мялимарихьинди, аспирантарихьинди, студентарихьинди тебрикнан гафар хьади илтIикIну, Сергей Меликовди вуз арайиз хувал республикайин уьмриъ важиблу гьядиса гъабхьиваликан гъапнийи. Вуздин гизаф выпускникарикан инженерар, чпиз айи дерин аьгъюваларин кюмекниинди, Дагъустандиъси уьлкейин жара регионариъра чпин удукьувалар улупну, жюрбежюр карханйирин кIулиъ айи касар гъахьну. Дагъустандин Главайи гъапиганси, думу хъуркьувалар чпин вари уьмур илимдиз бахш гъапIу вуздин аьлимарин, мялимарин гьунар ву.
«Гьаму машгьур тарихниинди дамагъ апIбахъди сабси, диди ляхниъ заан ери улупури зегьмет зигурайидариин, урхурайидариин деври тIалаб апIурайи пишекрар гьязур апIбан жавабдарвалра иливура.
Гъийин девриъ, чIуру ниятар ади, Урусатдин экономикайин санкцйир иливну, США ва Ригъ алабхъру терефнан уьлкйир ихь гьюкуматдиз къаршуди удучIвнайи вахтна, ухьу ляхнихьна хъана артухъ жавабдарвалиинди янашмиш духьну ккунду. Дагъустандиз, улихьди мушваъ лихури гъахьи заводар цIийи алауз, чан машгьурвал кьяляхъ хуз мумкинвал а. Ужудар аьгъювалар айи инженерар чарасуз лазим вуйи вахтна, ДГТУ-йи чан пайра кивну ккунду», — гъапну Сергей Меликовди.
Къайд апIувал лазим вуки, гьамусяаьт университетдиъ 4700 студентди урхура. Душваъ образование тувбан 140 программа уьмриз кечирмиш апIура, кьялан пишекарвалин гъуллугъчйир, хъа гьацира заан образование айи пишекрар 100-тIан артухъ программйириан аьгъювалар тувбиинди гьязур апIура. ДГТУ-йи оборонайинна промышленностдин комплексдин карханйириз пишекрар гьязур апIури 15 йистIан артухъ ву.
Университетдиъ 100-тIан артухъ илмарин докторари ва профессорари, 300-тIан гизаф илмарин кандидатари ва доцентари – вари пишекарвалин дережа айи 600-тIан артухъ мялимари ляхин апIура. Университетдин 24 гъуллугъчи жюрбежюр академйирин член-корреспондентар ва академикар ву.
Сергей Меликовди ДГТУ-йин ужударсдар гъуллугъчйириз гьюкуматдин пешкешарра тувнийи.
Республикайин Главайи наградйир тувдарин арайиъ ихь ватангьли, техникайин илмарин кондидат, ДГТУ-йин доцент Ширяли Юсуфовра айи.
Гьюрматлу Ширяли Аьбдулкьадиевич, республикайин «Табасарандин нурар» газатдин коллективдин терефнаан уву «Урусат Федерацияйин образованиейин цирклин гьюрматлу гъуллугъчи» кIуру ччвур тувбахъди кIваантIан тебрик апIури, увуз мюгькам сагъ’вал, жигьил наслиз аьгъювалар ва тербия тувбан ляхниъ заан хъуркьувалар ккун апIурача.
