12-пи октябриъ «Дагестанская правда» газатдин редакцияйиъ торпедйирин ва ракетйирин яракь адабгъбак лайикьлу пай киву машгьур аьлим Шамил Аьлиевдин иштирак’валиинди пресс-конференция кIули гъубшнийи.

 

 

Душваъ Шамил Гимбатовичди къайд гъапIганси, Дагъустан – дявдин машгьур конструкторариинди адлу регион ву. Яракь адабгърудар ихь региондихьинди заан хъугъ’вал алди лигура, фицики му терефнаан республикайиз тарихнан тажруба а. Дициб хъугъ’вал сад-кьюд йисандин арайиъ гъазанмиш апIуз шлуб дар.

СМИ-йин вакилариз аьлимди Мягьячгъалайиъ бицIидаринна набалугъарин конструкторвалин бюро тешкил апIбан гьякьнаан чан планарикан ктибтнийи.
Думу жюрейин бюро уьлкейин саб йишваъра адар, бюро Дагъустандин ва Урусатдин гележегдиз аьхю пешкеш хьибди.

– Гъи ухьуз урхуз ва жюрбежюр илмариин машгъул хьуз ккуни дирбаш, кIулиъ ужудар фикрар айи баяр-шубар ахьуз. Пуз ккундузузки, бажаранвал ктру бицIидар адар, дурарин гьарсарин кIвахьна, удукьуваларихьна рякъ дабгну ккунду. Дурарин суалари бязиган аьхюдар мюгьтал апIури шулу. Узуз бицIидарин юкIвар ачмиш апIуз ккундузуз. Хъа думу гизаф читин месэла ву», – гъапну аьлимди.

Шамил Аьлиев, гьюкуматдин терефнаан кюмек апIувал ккун апIури, сенатор Сулейман Керимовдихьна илтIикIбанди ву.

Конструкторвалин бюро аьлимди чан хусуси дачайиъ ерлешмиш апIбанди ву. Душваъ бицIидариз пулсузди аьгъювалар тувди. Аьгъювалар тувбан ляхин аьдати жюрейиинди ваъ, хъа тамаши саягъниинди кIули гъабхиди: чиб баяр-шубари директорин, урхурайирин, Ньютондин, Пифагорин, Лобачевскийдин ва жара аьлимарин роль уйнамиш апIиди. Хъа варитIан аьламатнан суалар тувру бицIидариз Шамил Аьлиевди стипендия тяйин апIиди.

Конструкторвалин бюро тешкил апIбан месэла республикайин Глава Сергей Меликовдихъди, РД-йин образованиейин ва илимдин министрихъди, жара идарйирин кIулиъ айидарихъди гьял дапIна. Дурар вари лазим вуйи кюмек тувуз гьязур ву.