Советарин Союз фашистарин Германияйихъди вуйи Ватандин Аьхю дявдиъ гъалиб хьувалин асас далиларикан саб – гизаф миллетарикан ибарат вуйи ва жюрбежюр динар хъаъру халкьарин сатIивал гъабхьну. 1941-1945-пи йисарин гъагъи дявдиъ ихь уьлкейин вари халкьар варитIан аьхю гъагъ чан гъюнариина гъадабгъу игит урус халкьдихъди битав гъахьнийи.
Думу дявдин садпи йигъарилан хъюгъну, агъзрариинди дагъустанлуйир Ватан уьбхюз гъушнийи. Хъа фронтдиз душнайи эскрар яракьдихъди, ипIрубдихъди, алабхьру палатдихъди тямин апIурайидар далу терефнаъ айи ватандашар вуйи. Далу терефнаъ айидари, чпин зегьметниинди дявдиъ айи эскрарик гъалибвалин рюгь капIри, фронтдиз гизаф кьадар кагъзар ва пешкешар хътаури гъахьну.
Гъи, Урусатди Украинайиъ хусуси метлеб айи дявдин операция гъабхурайи вахтна, США ва Ригъ алабхъру терефнан гизаф уьлкйир Урусатдиз къаршуди дийигънайиган, Дагъустандин халкьари хъана чпин сабвал улупура, Ватан уьбхюрайи эскрариз гьарури чахьан удукьру кюмек тувуз мумкинвал абгура. Сакьюдар мисалар хидиза.
Табасаран райондин глава Мягьямед Къурбановдин къарарниинди, хусуси метлеб айи дявдин операцияйиъ гъардшар, абйир иштирак шулайи хизанар райондин бицIидарин багъариъ ва яслийириъ тербия гъадабгъурайи бицIидарихъан пул тувувалихьан азад гъапIну. Дидланра савайи, райондин кIулиъ айирин гафариинди, касибвал кайи эскрарин хизанариз кюмек тувбан ляхнихьна меценатар жалб апIбанди ву.
Новолак райондин гьюкмари бегьем дару мобилизацияйин дахилнаъди женгар гъягъюрайи йишвариз гьаънайи муниципалитетдин агьалйириз хулар тикмиш апIуз жилин участокар жара апIбан къарар адабгъну.
Гъяякент райондин Первомайское гъулан агьалйири мобилизацияйикк ккахъу гъуландариз 3 йигъандин арайиъ 400 агъзур манат уч гъапIну. Уч гъапIу пулихъ мани палтар, ликариин алахьрудар, дармнар ва жара шей’ар масу гъадагъну. Гъуландари нубатнан жвумийин гъудгнин кьяляхъ хъана пул уч апIуз йикьрар дапIна.
Мягьячгъалайиъ шагьрин мэр Салман Дадаевдин табшуругъниинди, мобилизацияйикк ккахьу ватандашарин хизанариз кюмек апIбан бадали, штаб тешкил дапIна. Салман Дадаевди къайд гъапIганси, штабдин ляхниъ шагьрин саки вари гъуллугъар иштирак хьиди. Мидланра савайи, дугъу эскрар фронтдиъ айи вахтнара дурарин хизанарин вари гъайгъушнар чаина гъадагъуз гаф тувну.
Хусуси метлеб айи операцияйиъ иштирак шулайи ва дина гъягъюрайи эскрариз кюмек тувбан баркаллу ляхник чпин пай республикайин промышленностдин идарйирира, бизнесдин вакиларира, аьдати инсанрарира кивра. Гьаци, Мягьячгъалайин «Авиаагрегат» заводди армияйин игьтияжар гьуркIру алатар гьясил апIуз хъюгъбанди ву. Думу заводи 1994-пи йисхъан мина дявдин ва ватандаш’валин самолетариз, аэродромариз, «АвтоВАЗ» ОАО-йи гьясил апIурайи пучIу машинариз оборудование гьясил апIура.
Дагъустандин пучIу промышленностдин карханйири – «Надомник» ООО-йи, Имам Шамилин ччвурнахъ хъайи дерзичйирин фабрикайи, «БОФФ» ООО-йи, «ДОФ+» ООО-йи, «Армада» ООО-йи ихь эскрариз алахьру палтар, ликариин алахьрудар, ахнар-леъфарин чарчар-халар, ахуз дахъуз шлу шишлар гьязур апIура.
Мягьячгъалайиъ айи медицинайин диагностикайин «Астрамед» центрин кIулиъ айидари СВО-йиъ иштирак гъахьидарин сагъламвалин аьгьвалат пулсузди ахтармиш апIбан къарар адабгъну.
Чпин терефнаан республикайин кIулиъ айидарира хайлин ляхин гъабхура. Багарихьди мобилизацияйин дахилнаъди дявдин гъуллугъназ душнайидарин хизанарин вакилариз рес-публикайин вузарик урхуз кучIвуз хусуси метлеб айи квотйир жара апIиди. Дидин гьякьнаан Дагъустандин Глава Сергей Меликовди гьаму гьяфтайиъ кIули гъубшу Оперштабдин заседаниейиъ мялум гъапIну.
Мобилизацияйин дахилнаъди хусуси метлеб айи операция гъябгъюрайи йишвариз гьаънайидарин хизанариз сабишв’инди 100 агъзур манат тувра. Гьацира думу хизанариан вуйи бицIидариз кружокар, секцйир ва жара аьлава йишвариз гъягъювал пулсузди тешкил апIбанди ву. Республикайин образованиейин мектебдиз улихьна вуйи муниципальный тешкилатариъра (бицIидарин багъариъ) дурарин бицIидар пулсузди кьабул апIиди. Республикайин карханйириъ думу хизанарин вакилариз ляхинра сабпи нубатнаъди тувди. Уьмумиди гьаму метлебариз РД-йин Правительствойин резервдин фонднаан 350 млн манат жара гъапIну
Республикайиан Донбассдин агьалйириз ва душваъ женгариъ айи варж агъзрар тоннариинди итIру-убхъру сурсатар, дармнар, лазим шлу жара алатар хъадаъна. Донбассдин агьалйириз рягьимлувалин кюмек тувдарин арайиъ Дагъустан улхьан жергйириъ айи регионарикан саб ву.
Тялукь ляхин вари уьлкейиъра гъабхура. Гьаци, 12-пи октябриъ Мягьячгъалайиъ региондин идарйирин арайиъ «Мы вместе» штаб ачмиш гъапIну. Штабдин дахилнаъ гьюкмин ва жара идарйирин жавабдар гъуллугъчйир а. Штабди бегьем дару мобилизацияйин дахилнаъди Украинайиз гьаънайидарин хизанарин месэлйир гьял апIиди.
Гьамусяаьт РФ-дин вари аьтрафариин бегьем дару мобилизацияйин месэлйирин гьякьнаан «горячая линия» либхуз хъюгъна. Телефондин номер: 8 (800) 200-34-11.
Уьлкейин халкьарин ниятар саб духьну ихь эскрар багарихьди Гъалибвал гъадабгъну кьяляхъ гъюр кIури, ижми умуд кивдихьа. Фицики элин кьувват селин кьуват ву!
