Хьадукран ва чвлин йигъари мархьар ургъуз хъюгъиган, Мягьячгъала шагьрин бязи кючйир Венеция шагьрин гъанавар – кючйириз илтIикIуру. Шагьрин аьхю кючйириъ машинар гъягъбан гьяракат дишлади яваш шулу.

Мягьячгъалайиъ му месэла гьял апIури, гизаф йисар вушра, гьелелиг фукIара апIуз дубхьнадар. Мидланра савайи, мархьар ургъуз хъюгъиган, шагьрин гъирагъ-бужагъариъ яшамиш шулайи агьалйир акварихъра мягьрум шулу.

 

 

Аьхиримжи йигъари гъургъу мархьарин кьяляхъ, агьалйирин аьрзйир гьисабназ гъадагъну, Мягьячгъалайин мэр Салман Дадаевди шагьрин 14 кючейин аьгьвалат ахтармиш гъапIну. Думу кючйириъ айи мархьлин штар гъахру турбйир (коллекторар) 60-70 процент гъумру, жара хъархъсари ацIнади гъахьну. Мэрияйин коммуналин гъуллугъарин вакиларин дестейи думу турбйир марцц гъапIну, лазим вуйи йишварихь аьлава турбйир ккивну.

Шагьрин кIулиъ айири къайд гъапIганси, му кьадар шид марцц дапIнайи коллекторарихьанра кьабул апIуз шулдар. Шагьриз мархьлин ва жара чиркин штар гъахру цIийи турбйир лазим ву. 2021-пи йисан мэрияйи, шагьрин кючйириъ мархьлин шид гъябгъру цIийи турбйир ккивбан проект гьязур дапIну, республикайин Правительствойиз хътапIнийи. Проект Дагъустандин Глава Сергей Меликовди кьабул гъапIнийи ва 2022-пи йисандин бюджетдик кипнийи. Амма, бязи далилариз лигну, ляхниъ ишлетмиш апIру материалар масу гъадагъуз анжагъ гьамустIан мумкинвал гъабхьундайи. Мэрияйи рас апIбан ляхнарин конкурс мялум дапIна, дидин кьяляхъ подрядчик проект уьмриз кечирмиш апIувалихъ хъюгъди.

Салман Дадаевди шагьрин агьалйириз Мягьячгъалайин кючйир мархьарин кьяляхъ даграриз илтIикIбан дюшюшар терг апIуз гаф тувну.