Гьаму йисан Дагъустандиъ тIумтIарин лап заан бегьер – 256 агъзур тонна уч гъапIну. Думу улупуб гъубшу йисандин бегьертIан 37,8 процентдиинди артухъ ву.

 

 

Региондин тIумутIчивалин ва алкоголин низам-къайда уьбхбан комитетдин кIулиъ айи Шериф Керимхановди къайд гъапIганси, тIумтIарин уч гъапIу бегьернан аьхюну пай тартиб апIуз заводариз хътапIну.

Гьамусяаьт республикайиъ бегьер тувру 91 процент багълариан тIумтIар уч дапIну ккудукIну. ТIумтIарин варитIан аьхю бегьер Дербент, Гъяякент, Къарабудагъкент ва Табасаран районариъ уч гъапIну.

«Зиихъ тувнайи улупбар ишлетмиш апIури, къайд апIуз шулу: гьаму йисан уч апIру вари тIумтIарин кьадар 257 агъзут тоннатIан артухъ хьуз мумкин ву», – гъапну Шериф Керимхановди.

Октябрин вазлин аьхирариз тIумтIар уч дапIну ккудукIиди. Уч дапIнайи бегьернакан 1183 агъзур тонна тартиб апIуз заводариз хътапIну, думу кьадарра гъубшу йисандин улупбартIан 37%-диинди артухъ ву.

Табасаран райондин мяишатариъ уч гъапIу тIумтIарин гьякьнаан учуз райондин гъулан мяишатдин управлениейин начальник Аьгьмед Аваевди туву мялуматариинди, муниципалитетдин аьтрафариин 22 мяишатдиъ тIумтIин багълар кивна. Гьадрарикан гъийин йигъаз 18 мяишатдиъ бегьер уч апIура. ВаритIан гизаф кьадар багълар (751 гектар) «ДЗИВ» ОАО мяишатдиндар ву. Думу мяишатдиъ, саб гектариан 140 центнер тIумтIар ккудутIури, 10 агъзурна 516 тоннайин бегьер уч дапIну, тIумтIар ккудутIувалин ляхнар аьхирихъна гъафну.

«Райондиъ айи тумтIин мяишатарикан саб гектариан ригъун мейвайин варитIан гизаф кьадар уч гъапIу мяишат «Агасиев Г» КФХ ву. Думу мяишатди 28 гектариъ тIумтIин багълар итна. Гьелелиг бегьер анжагъ 8 гектариантIан уч дапIнадар. Цци, саб гектариан 212,5 центнер тIумтIар уч апIури, мяишатди 170 тоннайин бегьер ккадабццну. Хъа «Садар» ООО мяишатдиъ кIуруш, вари райондин мяишатарин арайиъ саб гектариан варитIан цIибди тIумтIар уч гъапIну. 55,2 гектариъ кивнайи тIумтIин багъларин саб гектариан 17 центнер тIумтIар ккудутIури, мяишатдиъ уч гъапIу тумтIарин уьмуми кьадар анжагъ 95,8 тоннатIан дар», –гъапну Аьгьмед Аваевди.