2022-пи йисан октябрин 19-пи йигъан Урусатдин Президент Владимир Путинди, 20-пи октябрилан башламиш дапIну, Донецкдин Халкьдин Республикайиъ, Луганскдин Халкьдин Республикайиъ, гьацира Херсонский ва Запорожский областариъ дявдин къайда, хъа уьлкейин имбу регионари гьязурлугвалин жюрбежюр дережйир тяйин апIуз къарар адабгъну. Дидин гьякьнаан уьлкейин кIулиъ айири ХатIасузвалин советдин членарихъди вуйи совещаниейиъ мялум гъапIну.

 

Указдиин къул зигбан кьяляхъ Владимир Путинди, РФ-дин Правительствойин Председатель Михаил Мишустин кIулиъ ади, хатIасузвалин ляхнин мянфяаьтлувал за апIру хусуси метлеб айи Совет арайиз хуз табшурмиш гъапIну. Советдин дахилнаъ вице-премьерар, кьувватнан идарйирин, президентдин администрацияйин, Государствойин Советдин вакилар хьиди. Дициб Советди уьлкейин вари регионарин арайиъ сигъ аьлакьйир уьрхюз мумкинвал тувди.

Октябрин 20-пи йигъан Дагъустандин Глава Сергей Меликовди республикайиъ думу Указ уьмриз кечирмиш апIбан месэлйириз бахш дапIнайи нубатнан дару совещание кIули гъубхну.

Серенжем ачмиш апIури, Республикайин Главайи Урусатдин Президентдин Указ гъурхну. Документдин гьякьнаан чан фикрар ачухъ апIури, дугъу къайд гъапIганси, ихь регион республикайин ватандашарин гьар йигъандин уьмриз манигъ’вал тутрувру «бинайиан гьязурди айи» гъатнан къайда айи регионарик кабхъра. Гьаддихъди сабси, жямяаьтлугъ къайда уьбхбаъ гьюкмин органарин жавабдарвал артухъ шула: жямяаьтлугъ хатIасузвал тямин апIбаъ; уьмрин важиблу мяна айи объектар террориствалин гьюжмихьан уьрхювал мюгькам апIбаъ; яракьлу кьувватариз ва жара игьтияжариз лазим вуйи сурсат гьясил апIру объектар уьрхбаъ.

Дагъустандиъ Президентдин Указдиъ улупнайи уьлчмйир уьмриз кечирмиш апIбан Гьяракатнан штабдин кIулиъ Сергй Меликов тяйин дапIна.
Гьяракатнан штабдин къарарар Дагъустандин аьтрафариин ляхин апIурайи гъурулушари, гьацира ватандашари чарасуз тамам дапIну ккунду.