Терроризмдихъди женг гъабхувал гьюкуматдин важиблу месэлйирикан саб дубхьна. Террори инсанариз хурайи аьзабнакан, зарарнакан бицIидаризра кмиди аьгъюди ккунду. Эгер деврин думу тIягъвнихъди гьюкуматдихъди сабси инсанарира женг гъабхури дархьиш, гьюкуматдин женгнан мянфяаьтлувал лап цIибтIан шулдар.

 

 

Улихьна йисарихь тевиган, Урусатдиъ террориствалин гьяракатар яваш духьна. Думу Террориствализ аькси милли комитетди, къанун уьбхру органари, мялуматарин аран терроризмдин идеология тарабгъувалихьан марцц апIурайи Роскомнадзори гъабхурайи профилактикайин сатIи вуйи ляхнин, гьацира жямяаьтлугъдин тешкилатари зигурайи зегьметнан натижа ву.
Культурайин идарйирира террориствализ аьксивал улупбак лайикьлу пай кивра.

Мягьячгъалайиъ гьар йисан гъийин деврин искусствойин террориствализ аькси фестивалар кIули гъягъюра. Республикайин культурайин министерствойи ва Дагъустандин Р.Гьямзатовдин ччвурнахъ хъайи Урус театри жигьилариз яратмиш апIбан кьюб конкурс – «Жигьилар террориз аьксиди» ва «Кавказдин бицIидар Кавказдиъ ислягьвалихъанди ву!» — кIули гъахури, магьа миржидпи йис ву. Гьаму йисан думу серенжемар 25-пи ва 27-пи октябриъ Дагъустан ансамблин Культурайин дараматдиъ кIули гъушну. Дидин гьякьнаан театрин мялуматарин гъуллугънан вакили хабар тувну.

Серенжемар гъахувалин метлеб – Дагъустандин жигьилар халкьдин аьдатариз вафалударди гъитувал, дурар фуну жюрейинра илзигувализ чпин аьксивал улупури, вердиш апIувал, республика артмиш хьувалин бина вуйи сатIивалин искусство тарабгъувал ва артмиш апIувал, гьацира жигьиларин ва мектебариъ урхурайидарин арайиъ уьмрихьна рюгьлувалиинди, эдеблувулиинди, утканвалиинди лигувал, мюгькам апIувал баяр-шубариз ватанпервервалин, милли фагьумлувалин тербия тувувал, дурар яшайишдинна культурайин уьмриъ гъахурайи ислягьвалин серенжемарин иштиракчйир хьуз гъитувал ву.

Яратмиш апIбан конкурсар шубуб номинацияйиъди кIули гъушну: эстрадайин вокал, художествойин урхувал ва хореографияйин искусство. Мидланра савайи, фестивалин дахилнаъди «Кавказдин бицIидар Кавказдиъ ислягьвалихъанди ву!» темайиан шиклар зигбан конкурсра гъахьну. Аьдатнаъ абхънайиганси, фестивалин асас иштиракчйир искусствойин мектебариъ, мектебарин заан классариъ урхурайидар, вузарин ва сузарин студентар, гьацира 6 йислан 14 йис’ина ва 15 йислан 18 йис’ина яшар духьнайи жигьиларин тешкилатарин вакилар вуйи. Фестивалин аьхю концерт гъябгъюрайи вахтна, культурайин ва искусствойин машгьур вакилари, Дагъустандин ва Урусатдин халкьдин лайикьлу артистари конкурсдиъ лигуз адагъу дизигнайи шиклариз кьимат тувнийи.

Концерт ккудубкIбан кьяляхъ фестивалин натижйир йивури, жюрийин председатель, Р.Гьямзатовдин ччвурнахъ хъайи Урус театрин директор Тимур Мягьямедовди гьамци гъапну: «Гъи жюрийиз баяр-шубарин арайиъ гъалибчи гъядягъюз лап читинди вуйи, концертдин иштиракчйир вари бажаранлудар ва лайикьлудар вуйи.Гьарсариз чухсагъул мялум апIуз ккундузуз. Гъи сягьнайиина удучIвдар вари гъалибчйир ву».
Жюрийи сесер тувбиинди, гъалибчйир тяйин гъапIнийи. Сабпи, кьюбпи ва шубубпи йишвар гъадагъу иштиракчйириз дипломарси, пулин пешкешарра тувну.