Октябрин аьхиримжи йигъари Каспийск шагьриъ Аьли Аьлиевдин ччвурнахъ хъайи спортдин дараматдиъ хьуб ражари вари дюн’яйин ва 9 ражари СССР-ин чемпион гъахьи Аьли Аьлиевдин гьюрмат уьбхбаз бахш дапIнайи, юкьяр дисбан спортдиан вари халкьарин арайиъ вуйи 52-пи талитар кIули гъушну.

 

 

Шадлугънан серенжем ачмиш апIуз Дагъустандин Глава Сергей Меликовра гъафнийи.

«Аьли Зуркарнаевичдин ччвур вари дюн’яйин юкьяр дисбан спортдиъ лап важиблуб ву. Дугъаз Швейцарияйиъ вари халкьарин «Юкьяр дисбан сатIи дапIнайи дюн’я» федерацияйин штаб-квартирайиъ ядигар дивна, Дагъустандиъра дугъан ядиграр а. Хъа юкьяр дисбаъ анжагъ дугъазтIан хас дару «аьлиевдин хач» спортдин приемди, йиз фикриан, гъира хайлиндариз гъалибвал гъадабгъуз кюмек тувра», – гъапну республикайин Главайи.

Чан удучIвну улхбан аьхириъ Сергей Меликовди талитарин иштиракчйириз хъуркьувалар ва заан гъалибвалар гъадагъувал, хъа тамашичйириз – кIваълан гьадрархру ва тясирлу талитар хьуб ккун гъапIну.

Турнир ачмиш апIру пайнаъ Аьли Аьлиевдин бай – Зуркарнай Аьлиевра иштирак гъахьнийи. Дугъу турнирин тешкилатчйириз чухсагъул гъапнийи, хъа дидин иштиракчйириз заан хъуркьувалар ккун гъапIнийи.

Талитариъ Урусатдин жюрбежюр регионариан ва багахь харижи уьлкйириан 200-дихьна спортсменар иштирак гъахьну. Талитар гъахуз гъагънан 10 категория улупнайи. Турнириъ варитIан заан натижйир улупу спортсменар гизафси Дагъустандиан вуйи: Муса Мехтиханов (57 кило гъагъ айи спортсменарин арайиъ), Муслим Мехтиханов (61 кило), Рамазан Ферзялиев (65 кило), Кьасум Кьасумов (74 кило), Амануллагь Гьяжимягьямедов (79 кило), Даурен Кюругълиев (92 кило), Шамиль Мусаев (97 кило) ва Аьбдуллагь Къурбанов (125 кило гъагъишнан спортсменарин арайиъ) гъизилин медаларин сагьибар гъахьнийи.

Са-саб гъизилин медалар Ингушетияйин спортсмен Мурад Евлоевди (70 кило) ва Кафария Осетия -Аланияйиан вуйи Заур Макиевди (86 кило) гъазанмиш гъапIну.