21-пи сентябриъ Урусатдин Президент Владимир Путиндин къул алди бегьем дару мобилизацияйин гьякьнаан удубчIву Указ тамам апIури, военкоматариин аьхю гъагъ алабхънайивализ лигну, ктабхъурайи йисандин чвлин призыв саб вазлин кьяляхъ гъабхуз къарар адабгънийи. Магьа уьлкейиъ ихь 2022-пи йисандин чвлин призыв 1-пи ноябрилан 31-пи декабриина гъяйиз тешкил дапIна.

 

 

 

Хив райондин военкоматра тешкил дапIнайи призывдин гьякьнаан тялукь ляхин гъабхбан гъаразнаъ а.

Гьелбетда, гьарсар абайизна бабаз жвуван велед улин ниниси ву. Чавра гъи, дюн’яйиъ сикинвал ва архаинвал фтиз кIуруш аьгъдру вахтна, дакьикьайин арайиъ бабан кIваан варжна къаб хиял гъягъюрайиган. Сабпи ноябриъ Хив райондин администрацияйиъ кIули гъубшу совещаниейиъ, уьлкейиъ айи аьгьвалатнахъди аьлакьалуди гъалабулугъвал кабхънайи призывникарин абйир-бабар чвлин призывдин дюзди гъаврикк ккаувал ккун апIури, райондин глава Ярмет Ярметов Хив ва Агъул районарин военный комиссар Пирмягьямед Къубачевдихьна илтIикIнийи.

Чан улхбаъ военный комиссари цци Хив ва Агъул районариан 18 йислан 27 йис’ина гъяйиз яш дубхьнайи 50-тIан артухъ жигьилар призывдин компанияйик кахьрайиваликан гъапнийи. «Гьарсар жигьилихьна, чан хусуси къул алди, повестка хилиз туврача, хъасин призывникдин сагъламвал ахтармиш апIури, дугъкан неврологдихьна, хирургдихьна, терапевтдихьна, стоматологдихьна ва психиатрихьна илтIикIуб ккун апIурача. Улупнайи районариан сач чвлин вахтна гьаънайи призывникарин кьадарнахь тевиган, му ражари гьаъру касарин кьадар цIиб ву. Уьлкейиъ улупнайи къанундин тIалабар райондин военкоматдиъ лазим вуйи къайдайиинди гюзет апIура. Улупнайи районариан 7-пи ноябриъ сабпи призыв хьибди. Дидихьна 5 кас гьязурди а. Гъит армияйиъ тамам йис дурарин жандиз мянфяаьт кади, хайирлуди ва ягъурлуди гъарабхри», – къайд гъапIну комиссари.