Дагъустан Республикайин Правительствойин табшуругъниинди, Украинайин аьтрафариин гъябгъюрайи хусуси метлеб айи дявдин операцияйин женгариъ айи эскрариз кюмек вуди, Дагъустан Республикайи лазим вуйи шей’ар масу гъадагъну. Думу шей’арин жавабдарвал гъабхрурди Дагъустандин МЧС тяйин дапIна, фицики, варитIан гъагъи аьгьвалатнан дюшюшарра тамам апIуз удукьрудар МЧС-дин гъуллугъчйир ву.

 

Улихьнаси Дагъустандин МЧС-ди республикайин военный комиссариатдинна Урусатдин оборонайин министерствойин аьрзйириинди, эскрариз варитIан лазим шлу шей’ар ва алатар масу гъадагъну, гьадму гьисабнаъди кьюрдуз мани палат, атIнар, улартIан дяряркъри машар илиркру баккйир, берцйир, учIвну дахъуз шлу шишлар, медицинайин сурсатар, манишин ва акв тувру генераторар ва гь.ж. 2-пи ноябриъ думу шей’ар вари МЧС-дин складдиан машинариъ ивну, рякъюъ тIаъну.

Эскрариз кюмек апIбан месэлайиз республикайин Глава Сергей Меликовдира асас фикир тувра ва гьюкмин гьарсаб органдин улихь варитIан лазим вуйи шей’ар масу гъадагъну ккунивалин вазифа дивра.

Мидланра гъайри, хусуси метлеб айи дявдин операцияйиъ иштирак шулайи эскрариз кюмек апIуз ккунидарин кьадарра йигълан-йигъаз артухъ шула. Эскрариз хътаурайи шей’арин арайиъ республикайин районариъ, шагьрариъ рягьимлувалин акцйир тешкил апIбиинди уч гъапIу шей’арра айи.

Гьамусяаьт саки вари республикайин муниципалитетариъ эскрариз кюмек апIбан акцйир кIулиъ гъахура. Гъулариъ айи кьаби бабарира кмиди кьюрдну ихь баяриз аьхъю дархьуз атIнар урхура.

«Накь гьау машинар йишв’ина хъуркьну, шей’ар эскрарихьна рукьбан кьяляхъ хъанара гьамциб «Ухьу сатIиди вухьа» акция давам апIидихьа», – къайд гъапIну чан телеграмм каналиъ Сергей Меликовди.