Гьаму йигъари Санкт-Петербург шагьриъ жаргъбаан вари Урусатдин марафон кIули гъубшну. Думу талитариъ 1000-рихьна инсанар иштирак гъахьну. Дурарин арайиъ ихь ватанагьли, Мягьячгъала шагьриъ чан хизандихъди яшамиш шулайи Табасаран райондин ТинитI гъул’ан вуйи Милана Дадашевара айи. Думу кьюбпи йишван сагьиб гъахьну.
Къайд апIуб лазим вуки, Миланайин адаш Максимра кьюд йис улихьна вари Урусатдин марафондиъ 42 километр манзилназ жаргъбаъ чемпион гъахьнийи.
«Учу му талитариъ сабпи йишв гъадабгъуз гьязур шули гъахьнийча. Талитар ккергъру йигъан улхьан йишван йиф гъубгъну. Гьаци вушра Милана чан улихь хьайирихъан кьюб секунддитIан кьяляхъ гъузундар. Марафон 1, 5, 10, 21, 42, 63 ва 100 километр жаргъру манзилариз жара дапIнайи. Милана саб километр манзилназ гъажаргъну. Мициб гьавайихьна учу гьязурди адайча. Марафонариъ Милана хайлин ражари иштирак гъахьну, амма миркк ва йиф али рякъюъ жаргъури дугъан сабпи раж вуйи. Рякъюъ думу швнуб-сабан, ликариин алидар кучвурхури, алдакури гъахьну», – ктибтура Миланайин адаш Максимди.
Му марафондиз улихьна Милана Дагъустандин чемпионатдиъ нубатнан ражари сарпир гъахьнийи. Миланайин гьеле 12 йистIан даршра, жаргъбан талитариъ думу аьхю яшнандарин сиягьдикра каъра. Чан таярин арайиъ думуси зарбди жаргърур Дагъустандиъ адар. Аьхюдарин арайиъ вуйи талитариъра Милана саки гьаммишан шубурпир шула. Улихьна йисан Чечен республикайиъ гъушу кьюбиб марафонариъра Миланайи варитIан заан натижйир гъазанмиш гъапIну.
«Марафондиъ финишдихьна цIибтIан манзил амдруган, узу Миланайиз гьялак апIру дих апIурза. Йиз сес гъеебхьиган, думу дигиш шулу: цIийи кьувват гъафиганси, гьялак духьну, чан улихь хьайидар вари хъяляхъ гъитри жаргъуру. Милана пишекарвалин спортдиин машгъул духьну кьюд йистIан дар. Дугъан тренер Евгений Драгановди шурак аьхю миж кивра. Хьуд йис гъабхьиган, Милана спортзализ хъади гъафнийза. Сабпи гамар дугъу гимнастикайиъ алдагъури гъахьну», – давам гъапIнийи ихтилат Максимди.
Милана Мягьячгъала шагьриъ 34-пи мектебдиъ 7-пи классдиъ ужудар аьгъювалариз урхура. Мектебдиъ дугъан шикил варитIан ужуди дарсар аьгъю ва бажаранлу ученикар кайи доскайик кебхна. Швнуб-саб ражари Милана вари мектебдин серенжемариъ РД-йин образованиейинна илимдин министерствойин, РД-йин минспортдин, Мягьячгъала шагьрин образованиейин управлениейин, спортдин комитетарин ва мектебдин кIулиъ айидарин терефнаан кубокар тувбиинди, гьюрматнан грамотйириинди, дипломариинди лишанлу апIури гъахьну. Чаз цIибтIан вахт адаршра, Милана дарсарианра ужудар аьгъювалариз урхура.
Пуз ккундузузки, Санкт-Петербургдин марафонарин тарихдиъ гъийин йигъаз Кавказдиан риш вая дишагьли гъалиб гъахьундайи. Милана Дагъустандиан ваъ, хъа вари Кавказдиан жаргъбаан пешкешнан йишваз лайикьлу гъахьи сарпи риш ву.
Шиклиъ: Милана Дадашева чан адашдихъди ва тренерихъди.
