6-пи ноябриъ Табасаран райондиан Урусатдин Яракьлу кьувватариъ гъуллугъ апIуз 6 жигьиликан ибарат вуйи десте рякъюъ убчIвну. Табасаран райондин военный комиссарин заместитель Надир Шихаигьмедовдин гафариинди, чвлин призыв 1-пи ноябриан 31-пи декабризкьан кIули гъябгъиди. Гьадму вахтнан арайиъ Табасаран райондиан яракьлу кьувватарин жергйириъ гъуллугъ апIуз вари 70 — рихьна жигьилар гьаъбанди ву.
Урусатдин Яракьлу кьувватариъ гъуллугъ апIуз гъягъюрайи жигьил эскрарин улихь, дурариз насигьятнан гафар кIури, Табасаран райондин главайин заместитель Рамис Уьсманов удучIвну гъулхнийи. «Учву ватандин улихь ичв буржи намуслувалиинди тамам апIур, ичв улихьди Урусатдин Яракьлу кьувватариъ гъуллугъ апIуз душнайи ихь игит эскрари гъазанмиш гъапIу ад учву зяя дарапIур кIури, миж кайич. Учву гъуллугъ апIру сад йисандин жикъи вахтнан арайиъ аьхю хъуркьувалар гъазанмиш апIруганси ибшри», – рякъ’ин алаурайи жигьилар Рамис Уьсмановди.
Призывникар гьязур апIру отделение-йин начальник Рафик Кьасумовди армияйиз гъягъюрайи жигьилар Урусатдин Яракьлу кьувватариъ гъуллугъ апIурайи ихь игит эскрарин командирарихьан дуфнайи кагъзарихъди таниш гъапIнийи. «Гьамцдар ужувлан кагъзар ичв командирарихьанра гъюр кIури, умуд кайич. Кьюд йигъан Дагъустан Республикайин призывдин пунктдиъ духтрар хъана ичв сагъламвализ лигиди. 8-пи ноябриъ учву Мягьячгъала шагьриан гъуллугъ гъабхру дявдин частариз гъахиди. Душваъра учвуз эскервалин палат ва лазим вуйи шей’ар тувди», – мялум гъапIнийи дугъу.
Гьацира жигьилариз дурарин абйир-бабарира ягъурлу рякъ ккун гъапIнийи.
8-пи ноябриъ Табасаран райондиан Урусатдин Яракьлу кьувватариъ гъуллугъ апIуз 7 жигьиликан ибарат вуйи кьюбпи дестера рякъюъ убчIвну.
Му десте рякъюъ тIапIбан бадали, Табасаран райондин главайин заместитель Ринат Мирзабалаевра дуфнайи. «Армияйиъ учвкан ужудар гъудуркьу жигьилар ктаиди, жиларси душну, сагъ-саламатди кьяляхъ гъачай», – ккун гъапIнийи дугъу.
Жигьил эскрариз насигьятар Табасаран райондин военный комиссар Садикь Мурадялиевди тувнийи: «Армия – жиливалин мектеб ву, дина вари жигьилар душну ккунду. Ухьуз варидариз кIваинди имихьуз, гьаму кьанаризкьан абйир-бабари армияйиъ дархьи бализ риш швуваз туври гъахьундар.
Гьамусдин жигьилари, гьаци вуйиб аьгъяди, армияйиккан кIулар ккадагъури имдар.
Армияйиз гъуху жигьил баяр 3 – 5 вазлин арайиъ аьгъювалар тувру центриъ цIийи техникайихъди ва жара ляхнарихъди таниш апIиди. РФ-йин оборонайин министр адабгънайи къарарназ асас вуди, му жигьилар хусуси метлеб айи дявдин операция гъябгъюрайи йишвариз гьаидар. Му ляхнин гьякьнаан РФ-дин военный прокуратурайи лап дикъатлуди гюзчивал гъабхиди», – къайд гъапIнийи военный комиссари.
Табасаранлуйири гьамусдихъантинара чпин буржи лайикьлуди тамам апIур кIури, умуд киврухьа. Тарихи гьядисйири улупганси, гьюкуматдиъ ужуб армия айиган, халкьдихьан мясляаьтниинди яшамиш хьуз, жигьилар вердиш апIуз ва гъюзимбу уьмриз планар йитIуз шулу.
