Гьаму йигъари Хив ва Агъул районарин военкоматдиан армияйиз рякъ’ин гъапIу 5 призывникдикан 4 Хив райондин Гъвандикк гъул’ан вуйи.
Газат урхру ихь ватанагьлийириз му призывдикан кьюб келима пуб ккун апIури, узу Гъвандикк гъулан главайихьна ва призывникарин санурин аба-йихьна илтIикIнийза.
«Райондин центриан призывникар рякъ’ин апIайиз кьюд йигъ улихьна дурарихъди йиз кабинетдиъ гюрюшмиш гъахьнийча. Армияйин гвачIин-хябяхъдикан гаф-чIал апIури, Ватанди гьарсар жилижвуван гъюнариин илипнайи буржи, кIул хъазабгну, закур жвув тербияламиш гъапIу абйир-бабариз, мялимариз ва гьацира администрацияйиз гаф дяргъруси, биябур даршлуси намуслувалиинди тамам апIуваликан гъулхнийза. Халис дагъустанлуйирин ифи жандиъ либхурайи, дагълариин гъилицу му асланари баб-ватан уьбхбак чпин лайикьлу пай киврувалиин ва, лазим гъабхьиш, гьяйиф дарди чпин жанра туврувалиин узу умудлу вуза. Гъит дюн’яйиъ ислягьвал ибшри ва ухьу дурар 12 вазлилан сагъ-саламатди багъри гъулаъ, райондиъ кьабул апIри», – гьаму гафар кIури, Гъвандикк гъулан глава Сарухан Мягьямедханов призывникарихьинди илтIикIнийи.
«Узу Урусатди Украинайиъ гъабхурайи хусуси метлеб айи дявдин операцияйин иштиракчи вуза. Гьадушваъ гъагъи зиян дубхьну, хайлин вахтна Москвайиъ госпиталиъ гъахьунза. Гьамус, 30 йигъандин отпуск тувур, гъулаъ аза. Бализ армияйиз дих апIурайи повестка гъафнийи. Дугъаз чпи СВО-йиз гъахурайиси гъабхьнийи, ва, чаинди вуш, армияйиз гъягъбаккан кIулар ккадагъуз ккунди, чарйир агурайи. Думу гьюкмин къанун-къайдайиз къаршуди удучIвурайидари туврайи кучIлин хабрари тясирнакк ккахърайиб аьгъю гъабхьунзуз. Хъа узу, 12 вазлиъ армияйиз душну, Ватандин улихь яв буржи тамам апIин, хъасин кьабул гъабхьиш, контракт бикIарва, кIури, учв дюз рякъ’ин алаъган, йиз бай дишла гьязур гъахьнийи. Гьацдар кучIлин хабрар абйир-бабаризра ерхьура. Гьаддиз дурарин юкIвар архаинди адар. Амма, пуз ккундузуз, улдугбан ляхин адар. Aрмияйиз гъягъюрайир чан 12 вазлиъ Урусатдин сяргьятариин хьиди. Хъасин, 12 вазлихъан, ичв веледди чан хушниинди ва аьшкьниинди контракт гъибикIиш, думу жара месела ву. Узура, сагъламвал йишв’ина гъафибси, йиз ляхниз ва ярар-дустарихьна гъягъидиза. Гьаци дарш ва душмнихьди узу ккагъуз гъитиш, дадайи чан мухрилан гъубхъу никк гьялал апIидар. Хъа гьаддиъ вари а», – кIура, нацистариз къаршу женгнаъ жюрэтлувал улупури, гъи отпуск багъри Гъвандикк гъулаъ гьапIрайи Самрудин Аьлиевди.
КIваин апIуз ккундузуз, 1-пи ноябрилан 31-пи декабриина гъяйиз тешкил дапIнайи чвлин призывдин кампанияйин дахилнаъди Хив ва Агъул районариан 18 йислан 27 йис’ина гъяйиз яш дубхьнайи 50-тIан артухъ жигьилар армияйиз гъахиди.
Улупнайи районариан сарпи жигьилар 7-пи ноябриъ ягъурлу гафариинди Хив райондин глава Ярмет Ярметовди, Хив ва Агъул районарин военный комиссар Пирмягьямед Къубачевди, юнармейцйири, волонтёрари, абйир-бабари ва багахьлу-йири армияйиз рякъ’ин гъапIнийи.
