Улихьна йигъари Дагъ. Огни шагьрин кIулиъ айи Жалалудин Аьлирзаевдин табшуругъниинди, бегьем дару мобилизацияйин дахилнаъди РФ-дин Яракьлу кьувватариъ гъуллугъ апIуз душнайи ватандашарин хизанариз кюмек гъапIну.
Гъубшу гьяфтайиъ узу Дагъ. Огни шагьрин главайин заместитель Эльдар Велиевдхъди гюрюшмиш гъахьунза. Дугъахъди бегьем дару мобилизацияйин дахилнаъди СВО гъябгъюрайи йивариз душнайи ватандашарин хизанариз апIурайи кюмекнан гьякьнаан гаф-чIал гъапIнийза.
– Эльдар Аьбдуллаевич, Урусатдин Федерацияйин Яракьлу кьувватарин жергйириз душнайи ватандашарин хизанариз кюмек тувбан серенжемариъ увура иштирак гъахьунва. Дурариз фициб кюмек гъапIунчва?
– Гьамусяаьт Урусатдин Федерацияйин вари субъектариъ «Ухьу сатIиди вухьа» кIуру акция жанлуди кIули гъябгъюра. Гъи думу акция Дагъ. Огни шагьриъра уьмриз кечирмиш апIура, ва дидин тешкилатчи шагьрин кIулиъ айи Жалалудин Аьлирзаев ву. Волонтерарин кIулиъ айи Ильдар Гьяшимовдихъди сабси, гьар гьяфтайиъ мобилизацияйин дахилнаъди дявдин гьяракатариъ иштирак’вал апIуз душнайи ватандашарин хизанариин улукьуз гъягъюрача, ва дурарин вари метлебар тамам апIурача. Ихь эскрарин хизанар фици дуланмиш шулаш, дурариз фицдар читинвалар алахьураш аьгъю дапIну, йицIишубуб хизандиз пулин ва тадарукарин кюмек гъапIунча – Рамазан Къафаровдин, Рафик Мурадовдин, Запир Къурбановдин, Ислам Гьяжиевдин, Альберт Заловдин, Равил Нафталиевдин, Михти Хидировдин ва хайлин жара хизанариз.
– Гъи дурариз фицдар читинвалар алахьура ?
–Хулан мяишатдиъ читинвал адру хизан адаршул. Гьарсаб хизандиъ жюрбежюр месэлйир шулу, хъа гъи ихь буржи – вари сатIи духьну, жвуван хушниинди Ватандин маракьар уьрхюз Урусатдин Федерацияйин Яракьлу кьувватарин жергйириз душнайи ватандашарин хизанариз артухъди фикир тувувал ву.
Думу хизанарин дуланжагъдин шартIар фицдар вуш дилигну, ляхниъ адрудар ляхнихъди тямин гъапIунча, бицIидарин багъариъ айи бицIидарихъан вазлин пул гъададабгъбан гьякьнаан къарар адабгъунча.
– Гъи уьлкейин вари шагьрариъ, районариъ ихь эскрариз кюмекар тувру пунктар ачмиш дапIна. Дина фу дубхну ккунду?
– Гъи ухьуз фуну жюрейинра кюмек лазим ву. Хъа гизафси узу исихъ ктуху шей’ар: синтепондин ахнар, гутйир, силбар марцц апIру щёткйир, сакъал ккадапIру алатар, сябнар, хилар марцц апIру салфеткйир, асккан алабхьру мани палат, плащ-палаткйир, аптечкйир, гъюнарихъ хъипру чанта (рюкзак), резиндин тапочкйир, антисептикар, палтар урччруган ишлетмиш апIру порошок, фонарикар, батарейкйир, блокнотар, ручкйир.
Эгер кюмек апIуз ккунир гъахьиш, зиихъ ктуху шей’ар хьади гьадму пунктдиз илтIикIуз шулу.
