Гъи полицияйин гъуллугъчйирин вазифа – жямяаьтлугъдин къайда уьбхювал, тахсиркрар агури, тахсиркарвалар ачмиш апIувал, терроризмдихъди, экстремизмдихъди, наркотикар тарагъувалихъди, къанунсузди яракь масу тувувалихъди женг гъабхувал, гьацира рякъяриъ гьяракатнан къайда тямин апIувал ва гьацдар жара месэлйир гьял апIувал ву.
МВД-йин гъуллугъчйирин йигъ улубкьайиз улихьна, узу РД-йин МВД-йин уголовный розыскдин оперуполномоченный, полицияйин майор Надим Мягьямедовдихъди (шиклиъ)сюгьбат гъубхунза. Дугъу гьаму йисан вари Урусатдин полицияйин гъуллугъчйирин пишекарвалин ва практикайин аьгъювалар улупбан конкурсдиъ гъалиб гъахьну.
Надим Мягьямедович Мягьямедов 1985-пи йисан Калмыкияйиъ мялимдин хизандиъ бабкан гъахьну. Душваъ ургубпи класс ккудубкIбалан кьяляхъ, думу чан абйир-бабарихъди Дербент шагьриз удучIвну гъафну ва мектебдиъ урхувал давам гъапIну. Ужудар аьгъювалар ади 11-пи класс ккудубкIбан кьяляхъ, 2003-пи йисан Надим Мягьямедов Ростов шагьриъ Кьибла федеральный университетдик урхуз кучIвру. Гьеле мектебдиъ урхури имиди балин кIваъ къанун уьбхру органариъ ляхин апIбан пишейихъ юкIв хъади гъабхьну. Дугъан набалугъ вахтнан хиялар кIулиз удучIвну. Университет ккудубкIган, 2008-пи йисан думу Ростов шагьриъ аьхю аьшкьниинди участокдин полицейскийди лихуз хъюгъну ва 2013-пи йисазкьан гьадму шагьриъ гъилихну. ЦIиб вахтна силис гъабхру отделиъра гъилихну. Ростовдиъ лихурайи йисари Надим Мягьямедовичдиз пишекарвалин аьхю тажруба тувру. Участокдин полицейскийдиз, хизандин месэлйирилан гъадабгъну, аьхю тахсиркарвалар ачмиш апIувал алабхъуру.
– Ватандашар полицияйиз аьрза апIури ужуб хабар хьади гъюрдар, гьарурин саб дарш жараб гьял апIуз даршлу месэла ади шулу, дурар къанун уьбхру органарин терефнаан кюмек ккунди илтIикIуру. Ич метлеб – ватандашариз кюмек апIувал ву. Хъа жвувахьна илтIикIу касдиз кюмек апIуз хьувал, дугъун мелзналан чухсагъул пубан гафар ерхьувал – ич пишейин эйсйириз думутIан аьхю шадвал адар, – кIура Надим Мягьямедовичди.
Ав, гъийин девриъ айтIан ляхнарин органариъ гъуллугъ гъабхувал рягьят ляхин дар. Полицияйин гъуллугъчйирин ляхин, зиихъ ухьу гъапиганси, хатIалуб, читинуб, жавабдарвалинуб ву. Къанун уьбхру органарин гъуллугъчи мюгькам сагъ’вал хъайир, спортдиин машгъул вуйир духьну ккунду. Дугъаз ляхниъ гьаммишан таниш дару касарихъди гюрюшмиш хьувал алабхъуру, гьаддиз дурарихъди сюгьбат албагуз аьгъяди хьувал чарасуз лазим ву. Думу гъуллугънаъ айи кас, гьаммишан мугъаятвал уьбхюри, гьякьлуди ляхин апIури, ватандашарихъди гаф-чIал апIуз, чан пишекарвалин вазифйир тамам апIуз аьгъяди, жвуван азад вахтра кмиди гьюкуматдин къанун уьбхбаз бахш апIуз гьязурди ккунду.
Гьарсар кас чан уьмриъси ляхниъра хъуркьуваларихьна гьачIарккури ккунду. Ростов шагьриъ ляхнин ужуб тажруба гъадабгъну, жигьил пишекар Дагъустандиз, чан ляхин уголовный розыскдиъ давам апIуз гъафну.
– Уголовный розыскдиъ апIру ляхин гизаф маракьлуб ву. Сабсдар дюшюшар тек-бирра алахьури шулдар. Инсан уголовный розыскдин подразделениейиз гъуллугъназ хабарсузди гъюрдар. Думу ляхниъ инсанариз кюмек апIбан, хъуркьувалар гъадагъбан бадали, пишейихъ юкIв хъади, гъянаъ оперативникдин рюгь ади ккунду. Оперативник йишвнура, йигънура, машквар йигъанра, отпускдин йи-гъанра гъуллугънаъ гъузра. Гьаддин гъавриъ хьпан кьяляхъ, гьациб ляхни увук гьевес капIрадарш, думу яв ляхин дар, – кIура майор Н.Мягьямедовди.
Суткайин фуну вахтнара ляхниз гъягъюз гьязурди айи касдихъди яшамиш хьузра рягьятди дар. Надим Мягьямедовичдин хизан дугъан ляхнихьна фици янашмиш шулуш гьерхиган, дугъу гьамциб жаваб тувнийи: «Гьелбетда, гьарсар инсандин далу – ужуб хизан ву. Жилир гьамциб ляхниъ айи дишагьли учвра гъавриъ ади ккунду. Йиз хпир дидин гъавриъ а, дугъан абйир-бабарра къанун уьбхру оганариъ ляхин апIури гъахьидар ву. Гьаддиз думу месэлайин гьякьнаан узуз читинвал адар. Йиз ляхнихъди думу вердишди ву».
Надим Мягьямедовдин хъуркьуваларикан гьаму йисан вари Дагъустандиз мялум гъабхьнийи. Дугъу вари Урусатдин уголовный розыскдин гъуллугъчйирин пишекарвалин устадвалин конкурсдиъ сабпи йишв гъадабгънийи. Узу дугъкан гьадму конкурсдикан ктибтуб ккун гъапIнийза.
– Гьаму йисан июндин 3-6-пи йигъари МВД-йин Омск шагьриъ айи академияйиъ Урусатдин МВД-йин дахилнаъ айи ОВД-йин уголовный розыскдин подразделенйирин арайиъ талитар кIули гъушнийи. Теорияйианси практикайианра аьгъювалар ахтармиш апIурайи талитариъ Урусатдин Федерацияйин вари субъектариан вакилари иштирак’вал гъапIнийи. Талитариъ варитIан гизаф баллар гъадагъну, узу сабпи йишваз удучIвунза. Узуз жюрбежюр дипломар ва грамотйир гизаф ашра, вари Урусатдин конкурсдиъ гъадабгъу диплом варитIан кьиматлуб вузуз, фицики узу вари уьлкейиз Дагъустан Республикайин уголовный розыскдин подразделениейин гъуллугъчйир ужударсдар вуйивал тасдикь гъапIунза. Республикайин айтIан ляхнарин органарин кIулиъ айидарин хъугъ’вал батIул гъапIундарза, – гъапнийи офицери..
Мициб хъуркьувал ихь табасаран халкьдин вакили гъадабгъувал ухьузра кьиматлу вухьуз. Гъит гьарсаб ляхниъ Надим Мягьямедовсдар пишекарвалин аьгъювалар айи гъуллугъчйир ишри.
