7-пи ноябриъ Табасаран райондиъ айи компартияйин отделениейин вакилари Хючна гъулаъ айи паркдиъ, Лениндин гюмбетдин гъвалахъ Октябрин инкъилабдин 105 йис хьпаз тялукь вуйи митинг кIули гъубхну.
Серенжем ачмиш дапIну кIули гъубхур Табасаран райондин компартияйин 1-пи секретарь Талиб МутIалимов вуйи. Чан улхбаъ дугъу жикъиди машкврин тарихнакан ва диди жямяаьтлугъ уьмриъ улихьган уйнамиш апIури гъабхьи роликан ктибтнийи.
«Мялум вуйиганси, цци 7-пи ноябриъ Октябрин инкъилаб дубхьну 105 йис тамам гъабхьну. Думу инкъилаб ихь уьлкейин уьмриъ аьхю гьядиса вуйи – дидин натижайиъ дюн’яйиъ сабпи, ачухъ социалист гьюкумат арайиз гъафну. Девлетлуйирин, кентхудйирин зулмиккан ккудучIвбан бадали, дюн’яйин халкьар му гьядисайиз агъзрариинди йисари ккилигурайи.
Дюзди гъапиш, му гьядисайи вари дюн’я ужувлахъинди илтIибкIну, гьаддиз му вари халкьарин машквар ву. Урусатдин тарихнаъ му вари дюн’яйин тарихназ рякъ ачмиш гъапIу аьхю гьядиса ву.
25-пи октябриъ йишвну, сяаьт 10-диз 20 дакьикьа ккимиди, «Аврора» крейсериан туву пакьнан ишарайиинди Зимний дворец дараматдиин алархьну, думу дибисну, большевикари Урусатдин вахтназ вуди дебккнайи правительство дустагъ гъапIну.
26-пи октябриъ «Ислягьвалин гьякьнаан декрет» адабгъну.
Вари Урусатдин кьюбпи съезддиъ «Халкьдин комиссарарин совет» кIуру правительствора ктагъну ва дидин сарпи руководитель Советарин гьюкумат тешкил гъапIу В.И.Ленин гъахьну.
Гьюкмихьна фягьлийирна нежбрар гъафну. Жил нежбрарин, хъа фабрикйир, заводар ва мяднар фягьлийирин хилиъ ахьну, ва сабпи социалист гьюкумат арайиз гъафну.
СССР гъадабгъхъантина Октябрин инкъилабдин йигъ къайд апIури имдар. Дидин ерина, «Халкьарин сабвалин йигъ» кIури, 4-пи ноябриъ машквар йигъси гьисаб апIуз хъюгъну. Гьаци вушра учуз, яшлу ксариз, тарих гьюдюхбакан цIиб гиран кади шулчуз. Учуз ич 7-пи ноябрин машквар хъана цIийи алапIуз ккунди ачуз», – къайд гъапнийи Талиб Муталимовди.
